अबुधाबी, संयुक्त अरब इमिरेट्स (UAE) ले कृत्रिम बुद्धिमत्ता (AI), मनोरञ्जन, कार्यक्रम र पर्यटन क्षेत्रका विशेषज्ञहरूका लागि चार नयाँ भिजा श्रेणीहरू सुरु गरेको छ। यो निर्णय फेडरल अथोरिटी फर आइडेन्टिटी, सिटिजनसिप, कस्टम्स एन्ड पोर्ट सेक्युरिटी (ICP) ले प्रवेश भिसा नियमहरूमा गरेका नवीन संशोधनहरूमार्फत घोषणा गरेको हो। यी नयाँ नियमहरूले UAE को “विश्वप्रति खुला दृष्टिकोण र प्रविधि, विशेष गरी कृत्रिम बुद्धिमत्ता, साथै मनोरञ्जन र पर्यटन क्षेत्रका प्रतिभा र उद्यमीहरूलाई आकर्षित गर्ने” लक्ष्यलाई बल पुर्‍याउने बताइएको छ।

नयाँ भिजा श्रेणीहरू

१. AI विशेषज्ञका लागि भिजा: प्रविधि क्षेत्रमा कार्यरत विशेषज्ञ वा अनुसन्धानकर्ताका लागि। एकपटक वा बहुपटक प्रवेश अनुमति दिइनेछ। प्राविधिक संस्थाबाट सिफारिस पत्र अनिवार्य हुनेछ। २. मनोरञ्जन भिजा: मनोरञ्जन प्रयोजनका लागि अस्थायी रूपमा UAE आउने विदेशीहरूलाई दिइनेछ। ३. कार्यक्रम (Event) भिजा: उत्सव, सम्मेलन, प्रदर्शनी, खेलकुद, सांस्कृतिक वा धार्मिक कार्यक्रममा सहभागी हुन आउने विदेशीका लागि। होस्ट संस्था सार्वजनिक वा निजी दुवै हुनसक्नेछ, तर कार्यक्रमको विवरण सहितको पत्र अनिवार्य हुनेछ। ४. पर्यटन (क्रूज/लक्जरी याट) भिजा: क्रूज जहाज वा याटमार्फत आउने पर्यटकका लागि बहुपटक प्रवेश भिजा उपलब्ध हुनेछ। यस्तो भिजाको लागि मान्य पर्यटन कम्पनी स्पोन्सर हुनुपर्नेछ।

अन्य प्रमुख परिवर्तनहरू

मानवीय आवास अनुमति (Humanitarian Residence Permit): युद्ध, विपत्ति वा अस्थिरता प्रभावित देशका नागरिकलाई एक वर्षका लागि बसोबास अनुमति दिइनेछ, जसलाई आवश्यक परेमा नवीकरण गर्न सकिनेछ। यसमा गारण्टर वा होस्टको आवश्यकता रहने छैन। विधवा र तलाकशुदा महिलाको बसोबास अनुमति: एमिराती वा विदेशी श्रीमान्को मृत्यु वा तलाकपछि महिलालाई एक वर्षका लागि बसोबास अनुमति दिइनेछ। सन्तानको हक राख्ने महिलाले आफ्ना बच्चालाई स्पोन्सर गर्न सक्नेछ। नातेदार र साथी स्पोन्सर गर्न नयाँ आय मापदण्ड: नजिकका परिवारका सदस्यका लागि न्यूनतम तलब ध ४,०००, दोस्रो/तेस्रो दर्जाका नातेदारका लागि ध ८,०००, र साथीहरूका लागि ध १५,००० मासिक आय आवश्यक हुनेछ। व्यवसाय अन्वेषण भिजा: आवेदकले आर्थिक क्षमता देखाउनुपर्नेछ वा विदेशमा सो क्षेत्रको व्यवसाय सञ्चालन गरिरहेको प्रमाण दिनुपर्नेछ। ट्रक चालक भिजा: मालवाहक कम्पनीको स्पोन्सरशिपमा एकपटक वा बहुपटक प्रवेश भिजा उपलब्ध हुनेछ। स्वास्थ्य बीमा र आर्थिक ग्यारेन्टी अनिवार्य हुनेछ। यी संशोधनहरूले UAE लाई प्रविधि, व्यवसाय, पर्यटन र मानवीय क्षेत्रमा अझ आकर्षक गन्तव्य बनाउने अपेक्षा गरिएको छ।