जेष्ठ ७, २०८३
इस्तानबुल ।
इंग्लिस फुटबल क्लब एस्टन भिल्लाका समर्थकहरूका लागि गएको रात कहिल्यै नबिर्सने ऐतिहासिक क्षण बनेको छ। टर्कीको इस्तानबुलमा भएको युरोपा लिग (Europa League) को फाइनल भिडन्तमा जर्मन क्लब फ्रेइबर्ग (Freiburg) लाई ३-० को सहज नतिजाले पाखा लगाउँदै भिल्लाले ३० वर्षपछि पहिलो पटक ठूलो उपाधि चुमेको हो।
एस्टन भिल्लाको यो ऐतिहासिक जितमा युरी टिलेमान्स, एमिलियानो बुएन्डिया र मोर्गन रोजर्सले गोल गर्दै टोलीलाई च्याम्पियन बनाए। तर, खेलको सबैभन्दा रोचक र साहसिक कथा भने टोलीका गोलकिपर एमिलियानो मार्टिनेजले रचे।
खेल सुरु हुनुअघि वार्म-अप (Warm-up) गर्ने क्रममा गोलकिपर मार्टिनेजको औँला भाँचेको थियो। तर, उनले मैदान छोड्न अस्वीकार गर्दै त्यही चोटका साथ ९० मिनेट पूरा खेले र टोलीका लागि क्लिन सिट (कुनै गोल नखाई) राख्न सफल भए।
खेलपछि प्रतिक्रिया दिँदै विश्वकप विजेता गोलकिपर मार्टिनेजले भने, "आज वार्म-अपका क्रममा मेरो औँला भाँचियो, तर मैले यसलाई नकारात्मक रूपमा लिइनँ। मैले यसअघि कहिल्यै औँला भाँचेको थिइनँ। खेलका क्रममा जतिबेला म बल समात्न खोज्थेँ, औँला अर्कैतिर सड्किन्थ्यो। तर, सफलताका लागि यस्ता पीडादायी क्षणहरूबाट गुज्रिनै पर्छ।"
मार्टिनेजले आफ्नो करियरमा फाइनल खेलहरूमा शतप्रतिशत जितको कीर्तिमानलाई कायम राखेका छन्। पछिल्लो ६ वर्षमा उनले आर्सनल, अर्जेन्टिना र एस्टन भिल्लाका लागि खेलेका सबै ७ वटा फाइनल खेल जितेका छन्।
एस्टन भिल्लाका डिफेन्डर म्याटी क्यासले जितपछि टोलीले बेलायती राजपरिवारका सदस्य एवं भिजिटिङ राजकुमार विलियम (Prince William) सँग ड्रेसिङ रुममा बियर खाँदै खुसीयाली मनाएको खुलासा गरे। राजकुमार विलियम एस्टन भिल्लाका कट्टर समर्थक हुन् र उनी फाइनल खेल हेर्न विशेष रूपमा इस्तानबुल पुगेका थिए।
म्याटी क्यासले ठट्टा गर्दै भने, "उहाँ (राजकुमार विलियम) ड्रेसिङ रुममा हामीसँगै बियर पिउँदै हुनुहुन्थ्यो। उहाँ निकै खुसी हुनुहुन्थ्यो। उहाँ हाम्रो ट्रेनिङ ग्राउन्ड र भिल्ला पार्कमा निरन्तर आइरहनुहुन्छ। उहाँ यस्तो ऐतिहासिक क्षणको हकदार हुनुहुन्थ्यो।"
यस जितसँगै एस्टन भिल्लाका मुख्य प्रशिक्षक उनाई इम्री (Unai Emery) को युरोपेली प्रतियोगितामा आफ्नो वर्चस्व पुनः प्रमाणित गरेका छन्। इम्रीले प्रशिक्षकका रूपमा आफ्नो पाँचौँ युरोपा लिग उपाधि जितेका हुन्। फुटबल इतिहासमा कार्लो एन्सेलोटी, जोसे मौरिन्हो र जियोभानी ट्रापाटोनीले मात्र ५ वा सोभन्दा बढी युरोपेली कप जितेका छन्।
टोलीका कप्तान जन म्याकगिनले प्रशिक्षक इम्रीको प्रशंसा गर्दै अबको लक्ष्य अर्को सिजनको च्याम्पियन्स लिग (Champions League) उपाधि भएको बताए। म्याकगिनले भने, "उहाँ (इम्री) एक जीनियस हुनुहुन्छ। हामीले उहाँलाई पाँचौँ युरोपेली ट्रफी दियौँ। अब अर्को वर्ष हाम्रो नजर च्याम्पियन्स लिगमा हुनेछ।"
