जेष्ठ ७, २०८३
लण्डन ।
इंग्लिस फुटबल क्लब आर्सनलले २२ वर्षको लामो प्रतीक्षालाई समाप्त पार्दै प्रिमियर लिग (Premier League) को उपाधि जितेको छ। म्यान्चेस्टर सिटी र बर्नमाउथबीचको खेल १-१ को बराबरीमा सकिएपछि मिकेल आर्टेटाको टोली सिजनको अन्तिम खेल अगावै च्याम्पियन बनेको हो।
बर्नमाउथको मैदानमा सिटीले अङ्क गुमाएसँगै शीर्ष स्थानमा रहेको आर्सनललाई गणितीय रूपमा भेट्टाउन असम्भव भएको हो। आर्सनलले यसअघि बर्नलीलाई १-० ले हराउँदै तालिकामा ५ अङ्कको स्पष्ट अग्रता बनाएको थियो। उपाधि पक्का भएसँगै आर्सनलका खेलाडी र समर्थकहरूले एमिरेट्स स्टेडियम बाहिर रातभर भव्य खुसीयाली मनाएका छन्।
ऐतिहासिक सफलताको खुसीयाली मनाउन आर्सनल क्लब र इस्लिङ्टन काउन्सिल (Islington Council) ले आगामी मे ३१ (जेठ १७ गते) दिउँसो २ बजेदेखि लण्डनको इस्लिङ्टन क्षेत्रमा भव्य 'विजई र्याली' (Title Parade) आयोजना गर्ने आधिकारिक घोषणा गरेका छन्।
यो र्याली आर्सनलले हंगेरीको बुडापेस्टमा पेरिस सेन्ट जर्मेन (PSG) विरुद्ध खेल्ने च्याम्पियन्स लिग (Champions League) को फाइनल खेलको भोलिपल्ट हुन लागेको हो।
आर्सनलले जारी गरेको विज्ञप्ति अनुसार, यदि टोलीले मे ३० मा हुने च्याम्पियन्स लिगको फाइनलमा पीएसजीलाई पराजित गरेमा मे ३१ को र्यालीमा प्रिमियर लिग र च्याम्पियन्स लिग दुवै ट्रफी सँगै प्रदर्शन गरिनेछ।
क्लबले भनेको छ, "हामी प्रिमियर लिग च्याम्पियन बनेका छौँ! यो अविश्वसनीय यात्रामा हामीलाई साथ दिने समर्थकहरूलाई धन्यवाद। यदि हामी बुडापेस्टमा पनि सफल भयौँ भने, यो र्यालीले इतिहासकै सबैभन्दा ठूलो उत्सवको रूप लिनेछ।"
र्यालीका कारण लण्डनको इस्लिङ्टन क्षेत्रमा यातायात र पार्किङमा ठूलो परिवर्तन गरिने स्थानीय प्रशासनले जनाएको छ। इस्लिङ्टन काउन्सिलकी नेत्री उना ओ'ह्यालोरनले आर्सनललाई बधाई दिँदै भनिन्, "इस्लिङ्टनका च्याम्पियनहरू नै आज सिङ्गो इङ्गल्याण्डका च्याम्पियन बनेका छन्। आर्सनलले नयाँ पुस्तालाई खेलप्रति प्रेरित गरेको छ।"
आर्सनलले सिजनको आफ्नो अन्तिम खेल आइतबार क्रिस्टल प्यालेसको विरुद्धमा उसैको मैदान (सेल्हर्स्ट पार्क) मा खेल्नेछ। सोही खेलको अन्त्यसँगै आर्सनलका कप्तान र खेलाडीहरूले प्रिमियर लिगको आधिकारिक ट्रफी हातमा उठाउनेछन्।
त्यसपछि टोलीको सम्पूर्ण ध्यान इतिहासमै पहिलो पटक च्याम्पियन्स लिगको उपाधि जित्ने तर्फ केन्द्रित हुनेछ। यसअघि आर्सनल सन् २००६ मा च्याम्पियन्स लिगको फाइनलमा पुगे पनि बार्सिलोनासँग पराजित भएको थियो।
