मंसिर २१, २०८२
बागमती,
सडक डिभिजन कार्यालय हेटौँडाले मुख्य सडक विस्तार कार्य हालका लागि रोकिएको जनाएको छ। यो निर्णय सर्वोच्च अदालतको मङ्सिर १९ गते जारी उत्प्रेषण (Interim) आदेश प्राप्त भएपछि लागू गरिएको हो।
कार्यालयका प्रमुख गुरुप्रसाद अधिकारीका अनुसार, सर्वोच्च अदालतको आदेशलाई सम्मान गर्दै हालका लागि डोजर प्रयोग गरेर सडक सीमाभित्र पर्ने संरचना भत्काउने कार्य रोकिएको छ। आदेश आज कार्यालयमा प्राप्त भएको जानकारी अधिकारीले दिएका छन्।
पूर्व–पश्चिम राजमार्गअन्तर्गत रातमाटेदेखि बुद्धचौक हुँदै राप्ती खोला पुलसम्म र त्रिभुवन राजपथअन्तर्गत बुद्धचौकदेखि सामरी पुलसम्मको सडक खण्डमा, सडकको मध्य भागबाट दायाँबायाँ २५–२५ गजभित्र निर्माण भएका स्थायी र अस्थायी घर तथा अन्य संरचना १५ दिनभित्र हटाउन सार्वजनिक सूचना जारी गरिएको थियो।
तोकिएको समयसीमा भित्र घरधनीले भौतिक संरचना नहटाएपछि, सडक डिभिजन कार्यालयले शनिबार रातमाटेदेखि बुद्धचौक हुँदै राप्ती पुलसम्मका करिब ५०० भन्दा बढी घर र संरचना डोजर प्रयोग गरेर भत्काएका थिए।
यस्तै, विन्दवासिनी कंसाकारले दायर गरेको रिट निवेदनमा सर्वोच्च अदालतले हेटौँडाको मुख्य सडक विस्तार सम्बन्धी सूचना कार्यान्वयन नगर्न अल्पकालीन अन्तरिम आदेश जारी गरेको थियो। आदेशअनुसार सडक डिभिजन कार्यालयले सडक विस्तारको सूचना यथास्थितिमा राख्नुपर्ने भएको छ।
