बैशाख २९, २०८३
नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले वर्तमान सरकारलाई संख्याको दम्भमा विधि र पद्धति नमिच्न कडा चेतावनी दिएका छन्। मंगलबार प्रतिनिधिसभाको बैठकलाई सम्बोधन गर्दै प्रचण्डले सरकारका पछिल्ला कदमहरू प्रतिशोधपूर्ण र अलोकतान्त्रिक भएको आरोप लगाए।
प्रचण्डले संसदलाई छलेर अध्यादेश ल्याउने, आलोचना गर्नेहरूलाई थुन्ने र प्रतिशोधको गन्ध आउने गरी धरपकड गर्ने कार्य भइरहेको भन्दै सरकारको ध्यानाकर्षण गराए। उनले बहुमत सधैँ नटिक्ने उल्लेख गर्दै आफ्नै विगतको उदाहरण दिए।
"संख्या कहिले पनि स्थायी हुँदैन, जनताको समर्थन सशर्त हुन्छ," प्रचण्डले भने, "२०६४ सालमा माओवादीले बहुमत ल्याउँदा पनि हामीले जोगाउन सकेनौँ। त्यसैले निषेध र अपमान होइन, विश्वास र सहकार्यलाई प्राथमिकता दिनुस्।"
सरकारले ल्याएको आगामी आर्थिक वर्षको नीति तथा कार्यक्रमलाई प्रचण्डले 'कर्मकाण्डी र यथास्थितिवादी' को संज्ञा दिए। उनले यो कार्यक्रमले सत्तारुढ दलको आफ्नै घोषणापत्र र राष्ट्रिय संकल्पको स्पिरिटलाई समेत समात्न नसकेको दाबी गरे।
साथै, संविधान संशोधनको चर्चाप्रति लक्षित गर्दै उनले भने, "संविधान संशोधन एकदमै संवेदनशील विषय हो, यसलाई हल्का रूपमा नलिनुहोला।"
सम्बोधनका क्रममा प्रचण्डले वर्तमान राजनीतिक संरचना र समावेशी संसद् सहिदहरूको बलिदानको उपज भएको बताए। उनले काठमाडौँको मेयरबाट सिधै फरक पार्टीको तर्फबाट प्रधानमन्त्री बनेका बालेन्द्र शाहको चर्चा गर्दै यो परिवर्तन पनि हिजोको क्रान्तिकै प्रतिफल भएको टिप्पणी गरे।
बढ्दो भू-राजनीतिक दबाब र शक्ति केन्द्रहरूको हस्तक्षेपप्रति चिन्ता व्यक्त गर्दै प्रचण्डले देशभक्त नेपालीहरू राष्ट्रिय हित र आत्मसम्मानका लागि एकजुट हुनुपर्नेमा जोड दिए। उनले प्रधानमन्त्रीले संसदीय मर्यादा र गरिमा पालना नगरे संसद्को औचित्यमाथि प्रश्न उठ्ने भन्दै मर्यादित बन्न सुझाव दिए।
प्रचण्डको यो सम्बोधनले संसद्मा विपक्षी दलको सशक्त उपस्थितिको संकेत गरेको छ भने सरकारका आगामी कदमहरूमाथि सूक्ष्म निगरानी राख्ने सन्देश समेत दिएको छ।
