चैत्र १, २०८२
@ नीता मानन्धर ,बेइजिङ
— चीन लेइरान मा विद्यालयमा भएको घातक मिसाइल आक्रमणमा ज्यान गुमाएका विद्यार्थीहरूको परिवारलाई दुई लाख अमेरिकी डलर आर्थिक सहयोग प्रदान गर्ने घोषणा गरेको छ। चीनले उक्त सहयोग मानवीय सहायताका रूपमा उपलब्ध गराइने बताउँदै पीडित परिवारप्रति गहिरो समवेदना व्यक्त गरेको छ।चीनको विदेश मन्त्रालयका अनुसार उक्त रकम चीनको रेड क्रस सोसाइटीमार्फत इरानको रेड क्रिसेन्ट सोसाइटीलाई हस्तान्तरण गरिनेछ। त्यसपछि सम्बन्धित निकायमार्फत पीडित विद्यार्थीका परिवारलाई सहयोग रकम वितरण गरिने जानकारी दिइएको छ।चीनले विद्यालय तथा बालबालिकामाथि हुने आक्रमणलाई अन्तर्राष्ट्रिय मानवीय कानुनको गम्भीर उल्लंघन भएको भन्दै घटनाप्रति गहिरो दुःख व्यक्त गरेको छ। चीनका अधिकारीहरूले निर्दोष नागरिक, विशेषगरी बालबालिकामाथि हुने हिंसात्मक कार्य अस्वीकार्य रहेको उल्लेख गर्दै यस्ता घटनाको कडा शब्दमा निन्दा गरेका छन्।विदेश मन्त्रालयका प्रवक्ताले जारी गरेको वक्तव्यमा पीडित परिवारप्रति गहिरो समवेदना व्यक्त गर्दै घाइतेहरूको शीघ्र स्वास्थ्य लाभको कामना पनि गरिएको छ। साथै, भविष्यमा यस्ता दुखद घटना दोहोरिन नदिन सबै पक्षले संयमता अपनाउनुपर्ने र नागरिकको सुरक्षालाई प्राथमिकता दिनुपर्नेमा चीनले जोड दिएको छ।इरानको दक्षिणी क्षेत्रमा रहेको एक विद्यालयमा भएको उक्त मिसाइल आक्रमणमा धेरै विद्यार्थीहरूको मृत्यु भएको थियो भने केही शिक्षक तथा कर्मचारी पनि घाइते भएको बताइएको छ। घटनापछि विद्यालय भवनको केही भागमा क्षति पुगेको र स्थानीय समुदायमा ठूलो शोकको वातावरण सिर्जना भएको अन्तर्राष्ट्रिय सञ्चारमाध्यमहरूले जनाएका छन्।उक्त घटनाले अन्तर्राष्ट्रिय समुदायमा गम्भीर चिन्ता र आलोचना उत्पन्न गरेको छ। विभिन्न मानवअधिकार संगठन तथा अन्तर्राष्ट्रिय संस्थाहरूले विद्यालयजस्ता नागरिक संरचनामाथि हुने आक्रमण मानवअधिकार र अन्तर्राष्ट्रिय मानवीय कानुनविरुद्ध भएको बताएका छन्।यस घटनापछि विभिन्न देश र अन्तर्राष्ट्रिय संस्थाहरूले घटनाको निष्पक्ष तथा पारदर्शी अनुसन्धान गर्न आह्वान गरेका छन्। साथै, युद्ध वा द्वन्द्वका अवस्थामा पनि विद्यालय, अस्पताल तथा नागरिक पूर्वाधारलाई सुरक्षित राख्न सबै पक्षलाई आग्रह गरिएको छ।विशेषज्ञहरूले द्वन्द्वग्रस्त क्षेत्रमा बालबालिका सबैभन्दा बढी प्रभावित हुने भएकाले उनीहरूको सुरक्षा सुनिश्चित गर्नु अन्तर्राष्ट्रिय समुदायको साझा जिम्मेवारी भएको बताएका छन्। उनीहरूले दीर्घकालीन रूपमा शान्ति स्थापना र कूटनीतिक संवादमार्फत समस्या समाधान गर्नुपर्नेमा पनि जोड दिएका छन्।चीनले भने मानवीय सहयोगमार्फत पीडित परिवारलाई राहत पुर्याउने प्रयास गरेको बताउँदै आवश्यक परे थप सहयोगका लागि पनि तयार रहेको संकेत दिएको छ। चीनको यो कदमलाई इरानसहित अन्तर्राष्ट्रिय समुदायले मानवीय सहयोगका रूपमा हेरिरहेको बताइएको छ।
