काठमाडौँ — “नो नट अगेन” भन्ने नारासहित उदाएको राष्ट्रिय स्वतन्त्र पार्टी (रास्वपा) अहिले गम्भीर विवाद, आरोप र कानुनी प्रक्रियाका कारण संकटमा देखिएको छ। सुशासन र पारदर्शिताको दाबी गर्दै आएको पार्टीको नेतृत्व र संगठनात्मक अभ्यासमाथि पछिल्ला घटनाक्रमले गम्भीर प्रश्न उठाएको छ।रास्वपा सभापति रवि लामिछानेमाथि सूर्यदर्शन, सुप्रिम र सहारा सहकारीको करोडौँ रुपैयाँ गोर्खा मिडियामा गैरकानुनी रूपमा प्रयोग गरिएको आरोप छ। संसदीय छानबिन समितिको प्रतिवेदनपछि उनीविरुद्ध कानुनी प्रक्रिया अघि बढेको हो। सहकारीका बचतकर्ताको रकम दुरुपयोग भएको आशंकाले सार्वजनिक आक्रोश बढाएको छ। मुद्दा हाल अदालतमा विचाराधीन छ।यससँगै लामिछानेको आर्थिक स्रोत र जीवनशैलीबारे पनि प्रश्न उठिरहेका छन्। पत्रकारिताबाट राजनीतिमा आएका उनको महँगो घर, धरौटी रकम र कानुनी खर्चको स्रोतबारे स्पष्ट विवरण सार्वजनिक नहुनुले अपारदर्शिताको आरोप थप बलियो बनेको छ।पार्टीका अन्य नेताहरू पनि विवादबाट अछुतो छैनन्। ढाकाकुमार श्रेष्ठमाथि मन्त्री बन्नका लागि रकम मागिएको अडियो सार्वजनिक भएपछि रास्वपाको भ्रष्टाचारविरोधी छवि गम्भीर रूपमा प्रभावित भएको थियो। डोलप्रसाद (डीपी) अर्यालको व्यवसायिक संलग्नता र महामन्त्री मुकुल ढकाललाई गरिएको कारबाही प्रक्रियाले पार्टीभित्र आन्तरिक लोकतन्त्र कमजोर रहेको आरोपलाई बल दिएको छ।यसैबीच, रास्वपाको आलोचना गर्नेहरू सामाजिक सञ्जालमा आक्रमणको सिकार हुने गरेको गुनासो पनि बढ्दै गएको छ। तथ्यमा आधारित आलोचनालाई अस्वीकार गर्दै समर्थकबाट हुने व्यक्तिगत आक्रमणले लोकतान्त्रिक बहस कमजोर बनाएको विश्लेषकहरूको भनाइ छ।राजनीतिक विश्लेषकहरूका अनुसार “नयाँ राजनीति”को दाबी गर्दै आएको दल आफैं पुरानै प्रवृत्तिको आरोपमा फसिनुले जनविश्वास गुम्ने जोखिम बढेको छ। रास्वपा नेतृत्वमाथि लागेका आरोपको निष्कर्ष अब कानुनी र संस्थागत प्रक्रियाबाटै टुंगो लाग्ने देखिन्छ।