एजेन्सी | युइएफए च्याम्पियन्स लिगको लिग चरणका खेलहरू समाप्त भएसँगै नकआउट चरणमा पुग्ने टोलीहरूको टुङ्गो लागेको छ। अन्तिम खेलमा सानदार जित निकाल्दै आर्सनल र बायर्न म्युनिखले तालिकाको शीर्ष दुई स्थान कब्जा गरेका छन्। शीर्ष ८ टोली: सिधै अन्तिम १६ मा प्रवेश यस पटकको लिग चरणमा आर्सनल शतप्रतिशत जितका साथ २४ अंक जोड्दै पहिलो स्थानमा रहन सफल भयो। बायर्न म्युनिख २१ अंकका साथ दोस्रो स्थानमा रह्यो। यस्तै, लिभरपुल र टोटनह्यामले पनि आ-आफ्नो खेल जित्दै शीर्ष आठमा स्थान सुरक्षित गरे। अन्तिम चरणअघि १३ अंकमा रहेका बार्सिलोना, चेल्सी, स्पोर्टिङ सीपी र म्यानचेस्टर सिटीले निर्णायक खेलमा जित हात पार्दै सिधै 'राउन्ड अफ १६' को टिकट काटेका छन्। नचेतिएको रियल म्याड्रिड र पिएसजीको धक्का लिगको तेस्रो स्थानमा रहेको रियल म्याड्रिड अन्तिम खेलमा बेन्फिकासँग अप्रत्याशित रूपमा पराजित भएपछि नवौँ स्थानमा झरेको छ। यस हारसँगै रियलले सिधै छनोट हुने अवसर गुमाउँदै अब 'नकआउट प्ले-अफ' खेल्नुपर्ने भएको छ। अर्कोतर्फ, पिएसजी र न्युक्यासल युनाइटेडले बराबरी खेलेपछि दुवै टोली शीर्ष आठबाट बाहिरिँदै प्ले-अफमा पुगेका छन्। इन्टर मिलानले बोरुसिया डर्टमन्डलाई पराजित गरे पनि सुरुवाती खेलहरूको खराब प्रदर्शनका कारण १० औँ स्थानमा चित्त बुझाउनु पर्यो। नापोली र आयाक्स बाहिरिए इटालियन क्लब नापोलीको लागि यो सिजन सुखद रहेन। अन्तिम खेलमा चेल्सीसँग पराजित भएपछि नापोली ३० औँ स्थानमा रहँदै प्रतियोगिताबाट बाहिरिएको छ। नापोलीसँगै आयाक्स, पिएसभी आइनहोभन, मार्से र भिल्लारियल जस्ता स्थापित क्लबहरू पनि यसै चरणबाट घर फर्किएका छन्। छनोट तालिकाको संक्षिप्त विवरण: * सिधै अन्तिम १६ मा (शीर्ष ८): आर्सनल, बायर्न म्युनिख, लिभरपुल, टोटनह्याम, बार्सिलोना, चेल्सी, स्पोर्टिङ सीपी, म्यानचेस्टर सिटी। * नकआउट प्ले-अफ (सिडेड): रियल म्याड्रिड, इन्टर मिलान, पिएसजी, न्युक्यासल, युभेन्ट्स, एथ्लेटिको म्याड्रिड, एटलान्टा, बायर लेभरकुजेन। * नकआउट प्ले-अफ (अनसिडेड): डर्टमन्ड, ओलम्पियाकोस, क्लब ब्रुगा, गालातासराय, मोनाको, काराबाघ, बोडो/ग्लिम्ट, बेन्फिका। * प्रतियोगिताबाट बाहिरिएका: नापोली, आयाक्स, मार्से, पिएसभी, भिल्लारियल लगायत १२ टोली।