न्युयोर्क — चर्चित सेलिब्रिटी स्टाइलिस्ट एरिन वाल्शका अनुसार न्युयोर्क सिटीको सोहो (SoHo) क्षेत्र महिलाको फेसन किनमेलका लागि सबैभन्दा आकर्षक स्थानहरूमध्ये एक हो। विशेषगरी वेस्ट ब्रडवे र ब्रडवेबीच फैलिएको ऐतिहासिक र ढुंगाले छापिएको सडक खण्डलाई उनले महिलाको फेसनका लागि उत्कृष्ट “माइक्रो-नेबरहुड” को रूपमा रोजेकी छन्।वाल्शले न्युयोर्क सिटीसँगको आफ्नो प्रेम Sex and the City सिरिजप्रतिको मोहबाट सुरु भएको बताएकी छन्। विद्यार्थी जीवनमै उक्त टेलिभिजन सिरिजबाट प्रभावित भएकी वाल्शले पछि गएर हलिउडका थुप्रै चर्चित स्टारहरूलाई स्टाइल गरिन्, जसमा स्वयं सारा जेसिका पार्करसमेत पर्छिन्।कलात्मक पहिचान बोकेको सोहो क्षेत्र उच्चस्तरीय बुटिकहरूका लागि प्रसिद्ध छ। यहाँ “असंख्य विकल्पहरू” उपलब्ध रहेको बताउँदै वाल्शले द वेब्स्टर (The Webster), केट स्पेड (Kate Spade) र क्लोए (Chloé) लाई आफ्नो मनपर्ने लक्जरी ब्रान्ड स्टोरका रूपमा उल्लेख गरेकी छन्।ठूला ब्रान्डसँगै, वाल्शलाई सोहोका गल्लीहरूमा लुकेका स्वतन्त्र (इन्डी) बुटिकहरू खोज्न पनि उत्तिकै मन पर्छ। मर्सर स्ट्रिटमा रहेको किर्ना जाबेटे (Kirna Zabête) जस्तो बुटिकले अनुभवी र नयाँ उदीयमान डिजाइनरहरूको छानिएको कलेक्सन प्रस्तुत गर्ने भएकाले आफूलाई आकर्षित गर्ने उनले बताइन्।यस क्षेत्रको भ्रमण गर्दा वाल्श “विशेष स्थान” हरूमा रोकिने गर्छिन्। तीमध्ये ला मर्सेरी (La Mercerie) उनको मनपर्ने गन्तव्य हो। “यो केवल रेस्टुरेन्ट मात्र होइन,” उनले भनिन्, “यो कपडा, शो–रूम र जीवनशैलीको मिश्रण हो। रेस्टुरेन्टमा भएका सबै सामग्री बिक्रीका लागि हुन्छन्—फूलसम्म पनि।”दिनको अन्त्यमा भने उनी प्रसिद्ध बिथाजार (Balthazar) रेस्टुरेन्ट र बारमा पुगेर दिन समापन गर्न रुचाउँछिन्।फेसन, कला र जीवनशैलीको संगम बनेको सोहोको यो खण्ड न्युयोर्क घुम्न आउने फेसनप्रेमी महिलाहरूका लागि अनिवार्य गन्तव्यका रूपमा स्थापित हुँदै गएको छ।