असार २, २०८३
काठमाडौँ । सम्बन्धित मन्त्रीहरू बैठकमा उपस्थित नभएपछि प्रतिनिधिसभाको आजको बैठक १५ मिनेटका लागि स्थगित गरिएको छ। विनियोजन विधेयक, २०८३ को विभिन्न शीर्षकमाथि मन्त्रालयगत छलफल जारी रहेका समयमा मन्त्रीहरूको उपस्थिति नभएपछि बैठक प्रभावित भएको हो।
आजको बैठकमा प्रधानमन्त्री कार्यालय, राष्ट्रपति तथा उपराष्ट्रपतिको कार्यालयसहित ८ वटा मन्त्रालयका लागि विनियोजन गरिएको बजेटमाथि छलफल भइरहेको थियो। तर, यति महत्त्वपूर्ण विषयमा छलफल चलिरहँदा संसद् भवनमा मात्र ३ जना मन्त्री उपस्थित थिए।
बैठकमा कार्यसूची अघि बढ्दै गर्दा नेपाल कम्युनिष्ट पार्टी (नेकपा) का सांसद गोपाल शर्माले संसद् नियमावलीको व्यवस्थाअनुसार सम्बन्धित मन्त्रालयको छलफलमा मन्त्रीहरूको अनिवार्य उपस्थिति हुनुपर्ने भन्दै नियमापत्ति (प्रश्न) उठाउनुभएको थियो।
सांसद शर्माले सम्बन्धित मन्त्रीहरू बिना मन्त्रालयको शीर्षकमाथि छलफल अगाडि बढाउन नसकिने बताउनुभयो। मन्त्रीहरूको यस्तो गैरजिम्मेवारपूर्ण व्यवहारले संसद्कै अपमान गरेको दाबी समेत उहाँले गर्नुभयो।
"सम्बन्धित मन्त्रीहरू बिना मन्त्रालयको बजेट शीर्षकमा छलफल हुन सक्दैन। यो संसद् र जनप्रतिनिधिहरूको अपमान हो।" — गोपाल शर्मा, सांसद
सांसद शर्माले संसद्को ध्यानाकर्षण गराउँदै कडा आपत्ति जनाएपछि बैठकमा केही बेर अन्योल उत्पन्न भएको थियो। त्यसलगत्तै सभामुख डिपी अर्यालले संसद् नियमावलीको मर्यादा र मन्त्रीहरूको उपस्थितिलाई ध्यानमा राख्दै १५ मिनेटका लागि बैठक स्थगित भएको घोषणा गर्नुभएको हो।
बजेट अधिवेशनको समयमा मन्त्रालयगत छलफलमा मन्त्रीहरू नै अनुपस्थित हुने प्रवृत्तिप्रति सांसदहरूले बारम्बार आक्रोश व्यक्त गर्दै आएका छन्।
