फिलिपिन्समा गम्भीर उष्णकटिबन्धीय आँधी बुआलोईले प्रहार गर्दा कम्तीमा तीन जनाको मृत्यु भएको छ भने करिब चार लाख मानिसलाई सुरक्षित स्थानमा सारिएको छ । देश अझै पनि यसअघि आएको सुपर टाइफुन रागासाको प्रभावबाट प्रभावित छ ।दक्षिणी लुजोनको बिकोल क्षेत्रमा एक सय १० किलोमिटर प्रतिघण्टाको गतिमा पश्चिमबाट उत्तरपश्चिम फैलिएको आँधीका कारण पर्खाल ढलेका, रूख उखेलिएका र छत उडाएका घटनामा तीन जनाको ज्यान गएको अधिकारीहरूले जनाएका छन् ।मासबेट प्रान्तमा आश्रय लिइरहेका निर्वासितहरूले ठूलो क्षति बेहोरेका छन् । “बिहान करिब ४ बजे हावाले चर्चको ढोका, झ्याल र छत उडाइदियो”, नगरपालिकामा इन्जिनियर जेरोम मार्टिनेजले एएफपीलाई भन्नुभयो । उहाँका अनुसार केही बालबालिकालाई सानो चोट लागेपछि उपचारको आवश्यकता परेको थियो ।“यो मेरो जीवनमा अनुभव गरेको सबैभन्दा बलियो हावा हो”, उहाँले भन्नुभयो, “धेरै मानिस अझै खाली हुन बाँकी छन्, किनकि धेरै घर ध्वस्त भए, छतहरू उडेर गए र सडक अवरुद्ध छन् ।”करिब चार लाख मानिस सुरक्षित स्थानमा पुर्‍याइसकिएको नागरिक सुरक्षा अधिकारी बर्नार्डो अलेजान्ड्रोले पत्रकार सम्मेलनमा जानकारी दिनुभयो ।बिकोलको मासबेट सहरका उद्धारकर्ता फ्रान्डेल एन्थोनी अबेलेराले भन्नुभयो, “अहिले हामी ठूलो रूख र बिजुलीका खम्बा हटाइरहेका छौँ, तर धेरै सडक अझै दुर्गम छन् । वर्षा तीव्र थियो, तर हावा अझ प्रबल थियो ।”सामाजिक सञ्जालमा सार्वजनिक भएका र एएफपीले प्रमाणित गरेका भिडियोहरूमा मध्य फिलिपिन्सको भिसायास टापुहरूमा बाढीका कारण सडकहरू पार गर्न मानिसहरूले डुङ्गा प्रयोग गरेको वा कम्मरसम्मको पानीमा हिँडिरहेको देखिन्छ । – निरन्तर विपद्को चपेटा – फिलिपिन्स प्रत्येक वर्ष औसत २० वटा आँधीबेहरी र टाइफुनको चपेटामा पर्छ । यसले लाखौँ मानिसलाई गरिबीको अवस्थामा निरन्तर राख्ने गरेको छ । वैज्ञानिकहरूका अनुसार मानव–सञ्चालित जलवायु परिवर्तनका कारण विश्व तातो हुँदै जाँदा आँधीबेहरी अझ प्रबल र विनाशकारी हुँदै गइरहेका छन् ।अधिकारीहरूले बिहीबार आउँदै गरेको आँधीसँगै तीन मिटर (१० फिट) सम्मको जीवनघातक समुद्री उच्च लहर आउन सक्ने चेतावनी दिएका थिए ।यसअघि आएको सुपर टाइफुन रागासाले देशको सुदूर उत्तरी भागमा कम्तीमा नौ जनाको ज्यान लिएको थियो र हजारौँ मानिसलाई विस्थापित बनाएको थियो । – जनआक्रोश र राजनीतिक दबाब – भारी विपद्बीच देशमा राजनीतिक आक्रोश पनि बढेको छ । करदाताहरूका अर्बौं डलर खर्च भएको विश्वास गरिएका तर वास्तविकतामा नक्कली ठहरिएका बाढी नियन्त्रण परियोजनाहरूसम्बन्धी घोटाला बाहिर आएपछि जनतामा असन्तोष उर्लिएको छ ।फिलिपिन्स सरकार अहिले उद्धार, राहत र पुनर्निर्माणमा जुटेको छ, तर नागरिकहरूको आक्रोश र जलवायु सङ्कटसँगको चुनौती झनै गहिरिँदै गएको छ ।