जेष्ठ ३०, २०८३
काठमाडौं ।
सह-घरेलु टोली अमेरिकाले फिफा विश्वकप २०२६ मा ऐतिहासिक सुरुवात गरेको छ । लस एन्जलस स्टेडियममा भएको समूह 'डी' को रोमाञ्चक खेलमा उत्कृष्ट प्रदर्शन गर्दै अमेरिकाले दक्षिण अमेरिकी प्रतिद्वन्द्वी पराग्वेलाई ४–१ को भारी अन्तरले पराजित गरेको हो । विश्वकप इतिहासमा अमेरिकाले कुनै पनि खेलमा चार गोल गरेको यो नै पहिलो पटक हो ।
खेलको सुरुवाती समयदेखि नै अमेरिकी खेलाडीहरू मैदानमा हाबी देखिएका थिए । अमेरिकी खेलाडीहरूको तीव्र गति (Speed) लाई पराग्वेका डिफेन्डरहरूले पछ्याउन निकै संघर्ष गर्नुपरिरहेको थियो ।
सातौँ मिनेटमा आत्मघाती गोल: अमेरिकाले बनाएको सुरुवाती दबाबकै कारण खेलको ७ औं मिनेटमा पराग्वेका डामियान बोबाडिलाले आफ्नै पोस्टमा आत्मघाती गोल गर्न पुगे । यसै उपहार गोलको मद्दतले अमेरिकाले खेलमा १–० को अग्रता लियो ।
बालोगुनको चम्किलो डेब्यु: खेलको २८ औं मिनेटमा अमेरिकाले गोल गर्ने एउटा सुनौलो मौका गुमाए पनि त्यसको ठीक चार मिनेटपछि, अर्थात् ३१ औं मिनेटमा स्ट्राइकर फोलारिन बालोगुनले उत्कृष्ट फिनिसिङ गर्दै टोलीको अग्रता २–० मा पुर्याए ।
इन्जुरी समयमा तेस्रो गोल: पहिलो हाफमा थप गरिएको ५ मिनेटको इन्जुरी समयको अन्तिम क्षणमा बालोगुनले व्यक्तिगत दोस्रो गोल गरे । यससँगै अमेरिकाले पहिलो हाफमै ३–० को विशाल र सुरक्षित अग्रता बनायो ।
दोस्रो हाफको सुरुवातमा पराग्वे केही आक्रामक रणनीतिका साथ मैदान उत्रियो । खेलको ४९ औं मिनेटमा पराग्वेले गोलको प्रयास गरे पनि अमेरिकी रक्षापंक्तिले त्यसलाई विफल पारिदियो । पहिलो हाफको तुलनामा दोस्रो हाफमा पराग्वेले आफ्नो खेलमा निकै सुधार ल्याएको देखिन्थ्यो ।
लगातारको प्रयासपछि खेलको ७३ औं मिनेटमा पराग्वेले एक गोल फर्काउन सफल भयो । दोस्रो हाफमा प्रतिस्थापित खेलाडीका रूपमा मैदान छिरेका माउरिसिओ मागाल्हासले उत्कृष्ट फिनिसिङ गर्दै खेललाई ३–१ को स्थितिमा ल्याए ।
खेलको निर्धारित ९० मिनेटपछि थपिएको इन्जुरी समयको पहिलो मिनेटमा अमेरिकाले गोलको एउटा राम्रो अवसर सदुपयोग गर्न सकेको थिएन । तर, खेल सकिनै लाग्दा र रेफ्रीले सिठ्ठी बजाउने अन्तिम सेकेन्ड बाँकी छँदा अमेरिकाले चौथो गोल थप्यो ।
अमेरिकाका युवा स्टार जियोभानी रेनाले खेलको अन्तिम सेकेन्डमा सानदार गोल गर्दै टोलीलाई ४–१ को ऐतिहासिक जित दिलाए ।
