जेष्ठ २७, २०८३
काठमाडौं — प्रधानमन्त्री बालेन्द्र (बालेन) शाहले नेपाल–भारत सीमा विवादका सम्बन्धमा संसद्मा दिएको विवादित अभिव्यक्तिलाई लिएर प्रतिनिधिसभामा विपक्षी तथा साना दलका सांसदहरूले कडा आपत्ति जनाएका छन्। प्रतिनिधिसभाको आजको बैठकमा बोल्दै सांसदहरूले प्रधानमन्त्रीको गैरजिम्मेवार भनाइले नेपालको अन्तर्राष्ट्रिय मञ्चमा शिर निहुरिएको भन्दै उक्त अभिव्यक्ति संसद्को रेकर्डबाटै हटाउन माग गरेका छन्।
श्रम संस्कृति पार्टीका अध्यक्ष एवं सांसद हर्क साम्पाङले प्रधानमन्त्री बालेन शाहको अभिव्यक्तिले नेपालको अन्तर्राष्ट्रिय स्तरमा बेइज्जत भएको र सिंगो देशको शिर निहुरिएको टिप्पणी गरे। सभामुखसँग समय माग गरी संसद्मा आफ्नो धारणा राख्दै सांसद साम्पाङले प्रधानमन्त्री संविधान र संसद्भन्दा ठूलो हुन नसक्ने स्पष्ट पारे।
"भौगोलिक अखण्डता र भूगोलबिना देश हुन सक्दैन," महाकाली नदीमा तटबन्ध निर्माण गरेर भइरहेको सीमा अतिक्रमणको प्रसंग उठाउँदै साम्पाङले भने, "मुलुकको सीमा मिचिएको विषयमा ध्यान दिनुको सट्टा सरकारका प्रधानमन्त्री आफैँले 'हामीले भारतको सीमा मिचेका छौँ' भनिदिएपछि राष्ट्रिय विवाद सिर्जना भएको छ र अन्तर्राष्ट्रिय स्तरमा देशको बेइज्जत भइरहेको छ।"
प्रधानमन्त्रीको सोही भनाइका कारण अहिले जनस्तरमा समेत गालीगलौज भइरहेको भन्दै उनले प्रधानमन्त्रीलाई कानुन र संविधानको दायराभित्र ल्याएर जिम्मेवार बनाउनै पर्ने माग गरे। आफू सधैँ विधि र प्रक्रियामा चल्नुपर्छ भन्ने पक्षमा रहेको स्पष्ट पार्दै उनले संसद्मा साना दलहरूको बोल्न पाउने अधिकारलाई सभामुखले सुनिश्चित गर्नुपर्नेमा समेत जोड दिए।
