✍️ सुनिल सिंह इस्लामाबाद – Shehbaz Sharif ले सोमबार Masoud Pezeshkian सँग टेलिफोन वार्ता गरेको बताएका छन्। उक्त वार्तामा दुवै नेताले खाडी क्षेत्रमा बढ्दो तनावबारे छलफल गर्दै तनाव घटाउने, संवाद र कूटनीतिमा जोड दिनुपर्नेमा सहमति गरेका छन्।प्रधानमन्त्री शरीफका अनुसार, वार्ताका क्रममा उनले इरानी राष्ट्रपति पेजेश्कियनलाई पर्शियन नयाँ वर्षको शुभकामना दिएका थिए। साथै, खाडी क्षेत्रको गम्भीर अवस्थाबारे छलफल गर्दै तत्काल तनाव कम गर्ने उपाय आवश्यक रहेको बताएका छन्।उनले सामाजिक सञ्जालमार्फत पाकिस्तानले क्षेत्रीय शान्ति स्थापनाका लागि रचनात्मक भूमिका खेल्न तयार रहेको उल्लेख गरेका छन्। पछिल्लो एक महिनामा दुवै नेताबीच पटक–पटक संवाद भएको छ, जसमा रमजान र ईदका शुभकामना आदान–प्रदानसँगै क्षेत्रीय द्वन्द्व अन्त्य गर्ने विषयमा पनि छलफल हुँदै आएको छ।इरानको राजधानी तेहरानमा विदेश मन्त्रालयका प्रवक्ता इस्माइल बकाइले केही मित्र राष्ट्रहरूबाट अमेरिकाले वार्ता गर्न चाहेको सन्देश आएको जानकारी दिएका छन्। इरानी सरकारी समाचार एजेन्सी IRNA का अनुसार, युद्ध अन्त्यका लागि कूटनीतिक पहलहरू तीव्र भइरहेको संकेत गरिएको छ।यस सन्दर्भमा पाकिस्तानलाई सम्भावित मध्यस्थकर्ताको रूपमा पनि हेरिएको छ। इजिप्ट र कतारसँगै पाकिस्तानले पनि द्वन्द्व समाधानमा भूमिका खेल्न सक्ने विश्लेषण गरिएको छ।यसैबीच, पाकिस्तानका उपप्रधानमन्त्री तथा विदेशमन्त्री इशाक डारले पनि इरानका विदेशमन्त्री अब्बास अराघचीसँग छुट्टै टेलिफोन वार्ता गरेका छन्। दुवै पक्षले पछिल्ला क्षेत्रीय घटनाक्रमबारे छलफल गर्दै शान्ति, सुरक्षा र स्थायित्वका लागि संवाद र कूटनीतिक पहलको महत्त्व मा जोड दिएका छन्।दुवै देशले वर्तमान अवस्थाबारे निरन्तर सम्पर्कमा रहने सहमति गरेका छन्।हाल मध्यपूर्व क्षेत्रमा बढ्दो तनावका बीच पाकिस्तान–इरान संवादलाई क्षेत्रीय शान्ति कायम गर्ने प्रयासको रूपमा हेरिएको छ।