जेष्ठ २९, २०८३
काठमाडौँ, २९ जेठ ।
परराष्ट्रमन्त्री शिशिर खनाल आगामी आइतबार (जेठ ३१ गते) छिमेकी मुलुक चीनको औपचारिक भ्रमणमा जाने हुनुभएको छ। चिनियाँ विदेशमन्त्री वाङ यीको औपचारिक निमन्त्रणामा मन्त्री खनाल बेइजिङ जान लाग्नुभएको परराष्ट्र मन्त्रालयले जनाएको छ।
राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाहको नेतृत्वमा नयाँ सरकार गठन भएपछि परराष्ट्रमन्त्री खनालको यो तेस्रो विदेश भ्रमण हो। नेपालमा सत्ता परिवर्तन भएसँगै चीनले आफ्ना पुराना परियोजनाहरूको भविष्यलाई लिएर चासो र संशय व्यक्त गरिरहेका बेला हुन लागेको यो भ्रमणलाई राजनीतिक वृत्तमा महत्त्वका साथ हेरिएको छ।
बेइजिङ बसाइका क्रममा परराष्ट्रमन्त्री खनालले आफ्ना चिनियाँ समकक्षी वाङ यीका साथै अन्य उच्चपदस्थ चिनियाँ अधिकारीहरूसँग दुई पक्षीय हित र आपसी सहयोगका विषयमा वार्ता गर्नुहुनेछ।
यसका साथै, मन्त्री खनाल बेइजिङस्थित नेपाली दूतावासले आयोजना गर्न लागेको विशेष लगानी सम्मेलनमा प्रमुख अतिथिका रूपमा सहभागी हुनुहुनेछ। सो क्रममा उहाँले चिनियाँ उद्यमी तथा व्यवसायीहरूसँग नेपालमा लगानीका सम्भावनाबारे विशेष अन्तरक्रिया समेत गर्ने कार्यक्रम तय भएको छ। मन्त्री खनाल आगामी असार ३ गते स्वदेश फर्कनुहुनेछ।
चीनको महत्त्वकांक्षी परियोजना बेल्ट एन्ड रोड इनिसिएटिभ (बीआरआई) कार्यान्वयनको विषय यस भ्रमणको मुख्य एजेन्डा बन्ने देखिएको छ। गत वर्ष तत्कालीन प्रधानमन्त्री केपी शर्मा ओली र परराष्ट्रमन्त्री डा. आरजु राणा देउवाको चीन भ्रमणका क्रममा दुई देशबीच 'बीआरआई कार्यान्वयन फ्रेमवर्क' मा औपचारिक हस्ताक्षर भएको थियो।
तर, फ्रेमवर्कमा हस्ताक्षर भएको लामो समय बितिसक्दा पनि भूराजनीतिक जटिलता र ऋण एवं अनुदानका सर्तहरूको असमझदारीका कारण परियोजनाहरू फिल्डमा अगाडि बढ्न सकेका छैनन्। चीनले यसलाई द्रुत गतिमा अघि बढाउन चाहे पनि नेपालको आन्तरिक राजनीतिक फेरबदल र वैदेशिक सन्तुलनका कारण यो विषय गिजोलिँदै आएको छ।
रास्वपा नेतृत्वको वर्तमान सरकारले चीनसँगको आर्थिक साझेदारी र बीआरआई परियोजनालाई कसरी अगाडि बढाउँछ भन्ने कुरा मन्त्री खनालको यसै भ्रमणको राजनीतिक संवादले तय गर्ने अनुमान गरिएको छ।
