जेष्ठ २२, २०८३
काठमाडौँ । परराष्ट्रमन्त्री शिशिर खनाल तीन दिने औपचारिक भ्रमणका क्रममा छिमेकी मुलुक भारतको राजधानी नयाँ दिल्ली पुगेका छन्। भारतीय विदेशमन्त्रीको मैत्रीपूर्ण निमन्त्रणामा नयाँ दिल्ली पुगेका मन्त्री खनाललाई इन्दिरा गान्धी अन्तर्राष्ट्रिय विमानस्थलमा भारतीय विदेश मन्त्रालयका नर्थ डेस्क प्रमुख मनु महावरले न्यानो स्वागत गरेका थिए।
भ्रमणका क्रममा परराष्ट्रमन्त्री खनालले भारतीय समकक्षीका साथै अन्य उच्च राजनीतिक नेतृत्व र सरकारी अधिकारीहरूसँग द्विपक्षीय हितका विविध विषयमा उच्चस्तरीय भेटवार्ता गर्ने कार्यक्रम तय भएको छ।
यसैबीच, भारतीय विदेश मन्त्रालयका प्रवक्ता रणधीर जैसवालले नेपालका परराष्ट्रमन्त्री खनालको यस भ्रमण र त्यसका क्रममा हुने उच्चस्तरीय भेटवार्ताहरूबारे नयाँ दिल्लीमा आयोजित नियमित पत्रकार सम्मेलनमा आधिकारिक जानकारी दिएका छन्। प्रवक्ता जैसवालले यो भ्रमणले भारत र नेपालबीचको सदियौँ पुरानो र बहुआयामिक सम्बन्धलाई थप सुदृढ र नयाँ उचाइमा पुर्याउने उद्देश्य राखेको बताए।
पत्रकार सम्मेलनमा बोल्दै प्रवक्ता जैसवालले भने, "भारत र नेपालबीच नियमित संवाद र उच्चस्तरीय भ्रमणहरू हुनु दुवै देशको साझा परम्परा जस्तै बनिसकेको छ। यो भ्रमणका क्रममा दुई देशबीचको राजनीतिक, आर्थिक, विकास साझेदारी तथा जनस्तरको (People-to-People) सम्बन्धलाई अझ सघन र परिणाममुखी बनाउने विषयमा विस्तृत छलफल हुनेछ।"
"नेपाल र भारतबीचको मैत्रीपूर्ण सम्बन्धलाई थप मजबुत र गतिशील बनाउन दुवै पक्ष पूर्ण रूपमा प्रतिबद्ध छन्," प्रवक्ता जैसवालले थपे।
तीन दिने यस भ्रमणका क्रममा दुई देशबीच विगतमा भएका सम्झौताहरूको प्रगति समीक्षा, कनेक्टिभिटी (सम्पर्क सञ्जाल), ऊर्जा व्यापार, आर्थिक सहयोग तथा सीमा क्षेत्रमा साझेदारी जस्ता महत्त्वपूर्ण एजेन्डाहरूमा छलफल हुने मन्त्रालय स्रोतले जनाएको छ। राजनीतिक नेतृत्वसँगको भेटघाटका अलवा मन्त्री खनाल नयाँ दिल्लीमा आयोजना हुने केही विशेष अन्तर्क्रिया कार्यक्रमहरूमा समेत सहभागी हुने तालिका रहेको छ।
