काठमाडौँ — बंगलादेशको हालै सम्पन्न संसदीय निर्वाचनमा केवल ६ सिटमा सीमित भएपछि नेसनल सिटिजन्स पार्टी (एनसिपी) ले मतगणनामा गम्भीर अनियमितता भएको भन्दै विस्फोटक आरोप सार्वजनिक गरेको छ। विद्यार्थी आन्दोलनपछि सत्ता परिवर्तन गर्दै बनेको यो पार्टीले निर्वाचन परिणाम स्वीकार गर्न नसक्ने संकेत दिएको छ।पार्टी प्रवक्ताले बंगलादेशी दैनिक द डेली स्टार लाई दिएको जानकारीअनुसार, ढाकाका धेरै निर्वाचन क्षेत्रमा आधिकारिक नतिजा, गणना विवरण र सञ्चारमाध्यमले प्रकाशित तथ्यांकबीच “स्पष्ट फरक” भेटिएको दाबी गरिएको छ। एनसिपीले जमात–ए–इस्लामी सहित ११ दलको गठबन्धनका उम्मेदवारहरूलाई लक्षित गरी नतिजा हेरफेर गरिएको आरोपसमेत लगाएको छ।

एनसिपीका अनुसार,
– केही स्थानमा पूर्ण गणना नहुँदै विजेता घोषणा गरिएको,
– केही मतदान केन्द्रको नतिजा पछि फेरिएको,
– र कुरीग्राम क्षेत्रमा मतगणनाका क्रममा दबाब सिर्जना गरिएको प्रमाण भेटिएको छ।

यी आरोपहरूले बंगलादेशको निर्वाचन प्रक्रियाको विश्वसनीयतामाथि गम्भीर प्रश्न उठाएको छ। एनसिपीले प्रभावित क्षेत्रमा पुनःगणनाको औपचारिक माग गरेको जनाएको छ।यसैबीच, निर्वाचनमा स्पष्ट अग्रता लिएको भनिएको बंगलादेश नेशनलिस्ट पार्टी (बीएनपी) का नेता तारिक रहमान प्रधानमन्त्री बन्ने लगभग निश्चित देखिँदा राजनीतिक तापक्रम झन् चर्किएको छ। तारिक रहमान पूर्वराष्ट्रपति जियाउर रहमान र पूर्वप्रधानमन्त्री खालिदा जिया का छोरा हुन्।विश्लेषकहरूका अनुसार, नतिजामाथि उठेका यी गम्भीर आरोप र पुनःगणनाको मागले बंगलादेशको राजनीति नयाँ अस्थिरतातर्फ धकेलिन सक्ने संकेत देखिएको छ। निर्वाचन आयोगको प्रतिक्रिया र आगामी कदमले अब परिस्थिति कुन दिशामा जाने भन्ने तय गर्नेछ।