असार ४, २०८३
थॉमस टुचेलको प्रशिक्षणमा रहेको इंग्ल्यान्डले फिफा विश्वकप २०२६ मा आक्रामक सुरुवात गरेको छ। डालस (टेक्सस) मा भएको समूह 'L' को रोमान्चक खेलमा कप्तान ह्यारी केनको दुई गोल तथा जुड बेलिङ्घम र मार्कस रासफोर्डको उत्कृष्ट प्रदर्शनको मद्दतले इंग्ल्यान्डले क्रोएसियालाई ४-२ गोल अन्तरले पराजित गरेको हो।
ग्यारेथ साउथगेटको युगमा रक्षात्मक रूपमा बलियो देखिने इंग्ल्यान्ड यसपटक टुचेलको नेतृत्वमा मैदान उत्रिँदा डिफेन्समा केही कमजोर तर ब्याटिङ लाइन (आक्रमण) मा भने निकै आक्रामक र घातक देखिएको थियो।
खेलको पहिलो हाफ निकै प्रतिस्पर्धात्मक रह्यो। कप्तान ह्यारी केनले दुई गोल गर्दै इंग्ल्यान्डलाई बलियो स्थितिमा पुर्याएका थिए। उनले पहिलो गोल पेनाल्टीमार्फत (जुन पुनः प्रहार गर्नुपरेको थियो) र दोस्रो गोल डिक्लन राइसको उत्कृष्ट कर्नरमा सानदार हेडरमार्फत गरेका थिए। यस दुई गोलसँगै केनले इंग्ल्यान्डका लागि विश्वकपमा सर्वाधिक १० गोल गर्ने ग्यारी लिनेकरको कीर्तिमानसँग बराबरी समेत गरेका छन्।
तर, डिफेन्डर जोन स्टोन्स र एज्री कोन्साको तालमेल नमिल्दा क्रोएसियाले दुई पटक खेलमा पुनरागमन गर्यो। स्टोन्सको गल्तीको फाइदा उठाउँदै मार्टिन बातुरिनाले क्रोएसियाका लागि पहिलो गोल गरे भने इभान पेरिसिचको पासमा पेटार मुसाले दोस्रो गोल गर्दै खेललाई २-२ को बराबरीमा ल्याए।
दोस्रो हाफ सुरु भएको दोस्रो मिनेटमै जुड बेलिङ्घमले दायाँ भित्रबाट डिबक्स छिर्दै उत्कृष्ट प्रहारमार्फत गोल गरेर इंग्ल्यान्डलाई ३-२ को अग्रता दिलाए। दोस्रो हाफमा इंग्ल्यान्डले क्रोएसियन पोस्टमा कुल २२ पटक सट प्रहार गर्दै पूर्ण रूपमा दबाबमा राख्यो।
क्रोएसियाका गोलकिपर डोमिनिक लिभाकोभिचले केही उत्कृष्ट बचाउ गरे पनि खेलको अन्त्यतिर सब्सटिच्युट खेलाडी बुकायो साकाको पासमा मार्कस रासफोर्डले चौथो गोल गर्दै इंग्ल्यान्डको ४-२ को सानदार जित सुनिश्चित गरे।
थॉमस टुचेल (मुख्य प्रशिक्षक, इंग्ल्यान्ड):
"पहिलो हाफमा हामी केही हतास देखियौँ र लय समात्न गाह्रो भयो। हामीले ब्याक-पास धेरै खेल्यौँ र बल विना पर्याप्त साहस देखाउन सकेनौँ। तर दोस्रो हाफमा खेलाडीहरूले जसरी प्रतिक्रिया र प्रदर्शन गरे, मलाई त्यो निकै मन पर्यो। हामीलाई लयमा आउन केही समय लाग्यो, तर अन्ततः हामी सफल भयौँ। यो हाम्रो लागि सकारात्मक सुरुवात हो।"
ग्यारी नेभिल (पूर्व फुटबलर तथा विश्लेषक):
"जुड बेलिङ्घम र ह्यारी केन नै इंग्ल्यान्डका मुख्य खम्बा हुन्। उनीहरूको आक्रमणले नै खेलमा फरक पार्यो। हामीले लुका मोड्रिचलाई खेल नियन्त्रण गर्न दिएनौँ, जुन विगतमा इंग्ल्यान्डले गर्ने गर्थ्यो। यो नयाँ युगको इंग्ल्यान्ड हो।"
यस जितसँगै ३ अंक जोड्दै इंग्ल्यान्ड समूह 'L' को शीर्ष स्थानमा रहेको छ। इंग्ल्यान्डले अब आफ्नो अर्को खेल आगामी मंगलबार घानाविरुद्ध खेल्नेछ।
