बैशाख ८, २०८३
काठमाडौँ — सामाजिक र राजनीतिक विषयमा तिखो टिप्पणी गर्ने लेखक तथा विश्लेषक दिल निशानी मगरले पछिल्लो समय राज्यले प्रदान गर्ने मान-पदवी र सेयर कारोबारको अपारदर्शी खेलमाथि कडा प्रश्न उठाएका छन्। उनले सन्दुक रुइत, सुदन गुरुङ र विचौलिया दीपक भट्ट जस्ता पात्रहरू एउटै कडीमा जोडिनुलाई 'लेन्डुप प्रवृत्ति' र 'स्वार्थको द्वन्द्व' का रूपमा व्याख्या गरेका छन्।
निशानीका अनुसार, अहिलेका पात्रहरूले ठगी र प्रशंसाको जुन अनौठो समीकरण बनाएका छन्, त्यो रवि लामिछाने र जीवी राईको प्रवृत्तिबाटै सापट लिइएको हो। उनी भन्छन्, "बाहिर एकअर्काको प्रशंसा गर्ने तर भित्रभित्रै नागरिक लुटेर आफ्नो साम्राज्य खडा गर्ने रवि-जीवी मोडल अहिलेका नयाँ 'शक्तिशाली' हरूका लागि आदर्श बनेको छ।"
उनले विशेष गरी सुदन गुरुङको सेयर कारोबारको विवरणलाई लिएर गम्भीर आशंका व्यक्त गरेका छन्।
प्राप्त विवरण अनुसार गुरुङले दोस्रो बजारबाट १० पटकमा ५३ लाख रुपैयाँभन्दा बढीको सेयर खरिद गरेको देखिन्छ। यो खरिद प्रक्रिया र समय निकै अर्थपूर्ण छ:
२०८२ माघ १५: एकै दिन करिब १५ लाख ७८ हजारको सेयर खरिद।
२०८२ माघ २७: १६ लाख १७ हजारको थप खरिद।
चैत ८ (गृहमन्त्री नियुक्त हुनुभन्दा ५ दिनअघि): एकै दिन ७ पटकको कारोबार गरी करिब २१ लाख रुपैयाँको सेयर खरिद।
निशानी प्रश्न गर्छन्, "गृहमन्त्री बन्नु ठीक ५ दिनअघि 'नासा सेक्युरिटिज' बाट एकै दिन ७ पटकसम्म किन र कसको सूचनाको आधारमा सेयर किनियो? के यो नीतिगत भ्रष्टाचारको पूर्वतयारी होइन?"
राज्यले दिने सम्मान (तक्मा) अहिले योगदान गर्नेलाई भन्दा पनि विचौलिया दीपक भट्ट जस्ता पात्रहरूको सेटिङमा चल्नेलाई दिइनुले लोकतन्त्रकै उपहास गरेको निशानीको तर्क छ। सन्दुक रुइत जस्ता सम्मानित व्यक्तित्व समेत यस्तो विवादास्पद घेरामा तानिनु वा विचौलियाहरूसँग नाम जोडिनुले राज्यको छनौट प्रक्रियामाथि ठूलो नैतिक प्रश्न खडा गरेको छ।
"तक्मा लिने र तक्मा दिनेहरूबीचको यो अपवित्र गठबन्धनले देशलाई सुशासन होइन, सेटिङको खाडलमा जाक्दैछ," दिल निशानी मगरले आफ्नो आलोचनामा उल्लेख गरेका छन्।
