माघ १८, २०८२
चितवन । राष्ट्रिय स्वतन्त्र पार्टी (रास्वपा) की सांसद सोविता गौतमलाई चितवनमा मतदाताहरूले घेराउ गर्दै कडा प्रश्नको वर्षा गरेका छन्। आफ्नो निर्वाचन क्षेत्र काठमाडौँ-२ छाडेर चितवन पुगेकी गौतमले स्थानीयको तीव्र आक्रोश र प्रश्नहरूको सामना गर्नुपरेको हो।काठमाडौँमा आगामी निर्वाचन जित्न कठिन देखेपछि 'सुरक्षित क्षेत्र'को खोजीमा चितवन झरेको आरोप खेपिरहेकी गौतमलाई स्थानीयले संसदीय भूमिकादेखि व्यक्तिगत योग्यतासम्मका विषयमा र्याखर्याख्ती पारेका हुन्।
छलफलका क्रममा सहभागीहरूले गौतमको संसदीय उपस्थितिको औचित्यमाथि गम्भीर प्रश्न उठाए। "सदनमा तपाईंले कतिवटा कानुन निर्माणमा ठोस योगदान दिनुभयो?" भन्दै स्थानीयले प्रश्न गरे। जनताका आधारभूत समस्या—महँगी, बेरोजगारी र विकासका मुद्दामा मौन बसेर पार्टी सभापति रवि लामिछानेमाथि लागेको सहकारी ठगीको आरोप बचाउन मात्रै समय खर्चिएको भन्दै स्थानीयले आक्रोश पोखेका थिए।
निर्वाचनका बेला "युरोपका गल्ली-गल्लीमा सूचना टाँसेर नेपाली युवालाई स्वदेश फर्काउने" बाचा सम्झाउँदै स्थानीयले उनलाई सोधे— "अहिलेसम्म कति युवालाई स्वदेश ल्याउनुभयो कि यो केवल भोट माग्ने फन्डा मात्र थियो?"
चितवनका मतदाताले गौतमको कार्यशैलीलाई भरतपुर महानगरपालिकाकी मेयर रेनु दाहालको कामसँग तुलना गरे। स्थानीयको भनाइ थियो:
"रेनु दाहालले काम गरेर विकासको लहर ल्याइन्, तपाईंको न शैक्षिक योग्यता (Masters) स्पष्ट छ, न त फिल्डमा काम नै देखिन्छ।"
योग्यता र नतिजा दुवैमा गौतम कमजोर रहेको दाबी गर्दै उनीहरूले चर्को आलोचना गरे।
प्रश्नहरूको सामना गर्न नसकेपछि सांसद गौतम कार्यक्रममै भावुक हुँदै रोएकी थिइन्। तर, स्थानीयले यसलाई "भावनात्मक ब्ल्याकमेल" र "आँसुको राजनीति" को संज्ञा दिएका छन्। सामाजिक सञ्जालमा सधैँ सक्रिय रहने तर भुइँ तहका जनताको समस्यामा उपस्थित नहुने प्रवृत्तिले उनको राजनीतिक भविष्यमाथि नै प्रश्न चिन्ह खडा गरिदिएको विश्लेषण गर्न थालिएको छ।
