बैशाख ८, २०८३
काठमाडौं । श्रम संस्कृति पार्टीका अध्यक्ष हर्कराज राईले गृहमन्त्री सुधन गुरुङको कार्यशैली र उनीमाथि लागेका निरन्तरका आरोपहरूले सरकारको सुशासनको नारामाथि नै प्रश्न उठाएको टिप्पणी गरेका छन्।
एक प्रेस विज्ञप्ति जारी गर्दै अध्यक्ष राईले गृहमन्त्री गुरुङलाई नैतिकताको आधारमा तत्काल पदबाट राजीनामा दिन सुझाव दिएका हुन्। बारम्बार नयाँ-नयाँ विवाद र प्रश्नहरूमा मुछिनु लोकतान्त्रिक प्रणाली र सुशासनका लागि शुभ संकेत नभएको उनको ठहर छ।
नैतिकता र राजीनामा: गृहमन्त्री जस्तो संवेदनशील पदमा रहेका व्यक्तिमाथि शृङ्खलाबद्ध प्रश्न उठ्नुले पदको गरिमा घटाएको भन्दै राईले तत्काल मार्गप्रशस्त गर्न आग्रह गरेका छन्।
सुशासनमा प्रश्न: सरकारले सुशासनको दाबी गरिरहँदा मन्त्रीहरू नै विवादको घेरामा रहनुले जनतामा निरासा पैदा गरेको राईको भनाइ छ।
सरकारलाई आग्रह: सरकारले जनताका आशंका र उठिरहेका प्रश्नहरूको स्पष्ट जवाफ दिनुपर्ने र स्पष्टीकरणमै अल्झिनुको साटो ठोस सुशासनमा ध्यान केन्द्रित गर्नुपर्नेमा उनले जोड दिएका छन्।
"जब कुनै सार्वजनिक ओहोदामा बसेको व्यक्तिमाथि बारम्बार प्रश्न उठ्छ, उसले स्पष्टीकरण दिएर पद जोगाउनुभन्दा नैतिकता देखाउनु उचित हुन्छ। सुशासन भाषणमा होइन, व्यवहारमा देखिनुपर्छ," राईले उल्लेख गरेका छन्।
श्रम संस्कृति पार्टीले वर्तमान सरकारका गतिविधिहरूलाई नजिकबाट नियालिरहेको बताउँदै, जनभावना विपरीतका कार्यहरू भए सशक्त खबरदारी गर्ने चेतावनी समेत दिएको छ।
