बैशाख १, २०८३
नयाँ वर्ष २०८३ को पहिलो दिन (बैशाख १ गते) देखि काठमाडौं महानगरपालिकाले नगरबासीको सहजताका लागि रात्रिकालीन बस सेवा सञ्चालनमा ल्याएको छ। साझा यातायातसँगको सहकार्यमा सुरु भएको यो सेवा आजैदेखि राति ८ बजेदेखि ११ बजेसम्म सञ्चालन हुनेछ।
लामो समयदेखि रातिको समयमा सार्वजनिक यातायात नहुँदा सास्ती खेपिरहेका यात्रु, विशेषगरी ढिलाभएसम्म काम गर्ने श्रमिक, विद्यार्थी र महिलाहरूलाई लक्षित गरी यो सेवा सुरु गरिएको हो।
सञ्चालन समय: राति ८:०० बजे देखि ११:०० बजेसम्म।
समय तालिका: प्रत्येक २० मिनेटको अन्तरालमा बस उपलब्ध हुने।
सुरक्षा व्यवस्था: प्रत्येक बसमा सीसीटीभी (CCTV) क्यामेरा जडान गरिएको छ र सुरक्षाका लागि नगर प्रहरी खटाइनेछ।
प्रविधि: सेवाका लागि वातावरणमैत्री विद्युतीय बसहरू प्रयोग गरिनेछ।
महानगरले प्रारम्भिक चरणमा दुईवटा व्यस्त रुटमा यो सेवा सुरु गरेको छ:
उत्तर-दक्षिण रुट (१६ कि.मी.): लगनखेल – पाटन अस्पताल – नर्भिक – प्रसूति गृह – वीर अस्पताल – टिचिङ अस्पताल – सहिद गंगालाल हृदय केन्द्र हुँदै बुढानीलकण्ठसम्म।
पूर्व-पश्चिम रुट (२० कि.मी.): थानकोट – कलंकी – कालीमाटी – त्रिपुरेश्वर – बानेश्वर – तीनकुने हुँदै त्रिभुवन अन्तर्राष्ट्रिय विमानस्थलसम्म।
"राति ८ बजेपछि सार्वजनिक सवारी साधन नपाउँदा सर्वसाधारणले महँगो शुल्क तिरेर यात्रा गर्नुपर्ने बाध्यतालाई अन्त्य गर्न यो कदम चालिएको हो," काठमाडौं महानगरपालिकाकी कार्यवाहक प्रमुख सुनिता डंगोलले जानकारी दिनुभयो।
यो सेवाले काठमाडौंको रात्रिकालीन जनजीवनलाई थप चलायमान बनाउने र सुरक्षित यात्राको प्रत्याभूति दिने विश्वास गरिएको छ।
@samayasutra
