माघ १०, २०८२
@सुनिल सिंह काठमाडौं
नेकपा एमालेका अध्यक्ष केपी शर्मा ओलीले निर्वाचनको तयारीसँगै आवश्यकता परे आन्दोलनमा उत्रिन सकिने चेतावनी दिएपछि नेपाली राजनीतिमा नयाँ बहस सुरु भएको छ। एक कार्यक्रममा बोल्दै ओलीले परिस्थितिले बाध्य बनाए निर्वाचनभन्दा बाहिर रहेर आन्दोलनको बाटो रोज्न सकिने संकेत दिएका हुन्।ओलीको यस अभिव्यक्तिलाई लिएर सत्तारूढ पक्ष तथा विपक्षी दलहरूले आलोचना सुरु गरेका छन्। आलोचकहरूले यसलाई “आन्दोलनको नाममा फुस्रो धम्की” भन्दै चुनावी दबाब सिर्जना गर्ने रणनीति मात्र भएको आरोप लगाएका छन्।राजनीतिक विश्लेषकहरूका अनुसार ओलीको भनाइ व्यवहारिकभन्दा बढी राजनीतिक दबाब सिर्जना गर्ने उद्देश्यले आएको देखिन्छ। उनीहरू भन्छन्, “निर्वाचन प्रक्रियाबाट बाहिरिने चेतावनी लोकतान्त्रिक अभ्याससँग मेल खाँदैन, यो कार्यकर्ता उत्साहित पार्ने भाषण मात्र हुन सक्छ।”एमाले नेतृत्व भने ओलीको अभिव्यक्तिलाई गलत अर्थ लगाइएको दाबी गर्दै पार्टी लोकतान्त्रिक विधि र जनअधिकारको पक्षमा अडिग रहेको बताउँछ। पार्टी स्रोतका अनुसार आन्दोलनको कुरा कुनै अराजकता होइन, सरकारको असफलताविरुद्ध जनदबाब सिर्जना गर्ने सन्दर्भमा आएको हो।
ओलीको चेतावनीले चुनावी माहोल थप तातेको छ भने आगामी दिनमा एमालेको रणनीति निर्वाचन केन्द्रित रहने कि सडक आन्दोलनतर्फ मोडिने भन्ने विषय चासोको केन्द्र बनेको छ।
