मेस्सीले रचे एमएलएसको इतिहास, लगातार दोस्रो वर्ष गोल्डेन बुट जित्ने पहिलो खेलाडी बने

कार्तिक २४, २०८३

अर्जेन्टिनाका स्टार फुटबलर लियोनेल मेस्सीले मेजर लिग सकर (एमएलएस) को इतिहासमा नयाँ कीर्तिमान कायम गरेका छन् । इन्टर मियामीका कप्तान मेस्सी सन् २०२५ र २०२६ मा लगातार दुई सिजन गोल्डेन बुट जित्ने एमएलएसकै पहिलो खेलाडी बनेका छन् ।

चालु सिजनको नियमित च्याम्पियनसिप सकिँदा मेस्सीले लिगमै सबैभन्दा बढी २६ गोल गरेका थिए । उनले सिजनभर ३१ खेल खेलेर २६ गोल र १७ गोल सहयोग गरेको विवरण सार्वजनिक भएको छ । यसरी उनी दोस्रो स्थानका पेटार मुसाभन्दा चार गोलले अगाडि रहे । लिगले शनिबार नियमित सिजनको अन्तिम दिन यो पुरस्कार घोषणा गरेको थियो ।

यसअघि सन् २०२५ मा मेस्सीले २८ खेलमा २९ गोल गरेर आफ्नो पहिलो गोल्डेन बुट जितेका थिए । त्यसपछि यो वर्ष पनि उही उपलब्धि दोहोर्‍याएर उनले एमएलएसमा आफ्नो दबदबा कायम राखेका छन् । उनी एमएलएसमा एकभन्दा बढी पटक गोल्डेन बुट जित्ने छैटौँ खेलाडी पनि बनेका छन् ।

मेस्सीको नेतृत्वमा इन्टर मियामी यसपटक इस्टर्न कन्फरेन्समा दोस्रो स्थानमा रहेर सिजन समाप्त गरेको छ र एमएलएस कप प्लेअफका लागि छनोट भएको छ । व्यक्तिगत उपलब्धिसँगै टोलीको सफलतामा पनि उनको महत्त्वपूर्ण भूमिका रहेको मानिएको छ ।

यसैबीच, मेस्सी एमएलएसका पहिला लगातार दुई वर्ष सर्वाधिक मूल्यवान खेलाडी (एमभीपी) पुरस्कार जित्ने खेलाडी पनि बनिसकेका छन् । गोल्डेन बुटको यो उपलब्धिसँगै उनी लिगको इतिहासमा सबैभन्दा प्रभावशाली खेलाडीको रूपमा चिनिन थालेका छन् ।

अब सबैको ध्यान प्लेअफमा केन्द्रित छ, जहाँ मेस्सीले इन्टर मियामीलाई एमएलएस कपको उपाधिसम्म पुर्‍याउन सक्छन् कि भन्ने चासो फुटबलप्रेमीमा देखिएको छ ।

सम्पर्कमा रहनुहोस्