असार ३, २०८३
नेपाली कांग्रेसका सांसद चन्द्रमोहन यादवले प्रतिनिधिसभाका सभामुख डोलप्रसाद अर्यालमाथि पूर्व राजनीतिक आबद्धताको धङधङ्ती अझै बाँकी रहेको टिप्पणी गरेका छन्। बुधबारको प्रतिनिधिसभा बैठकमा बोल्दै सांसद यादवले सभामुख अर्यालले पूर्व पार्टीसँगको सम्बन्ध पूर्ण रूपमा विच्छेद गर्न नसकेको र पदीय आचरण बिर्सिएको आरोप लगाएका हुन्।
सांसद यादवको उक्त अभिव्यक्तिप्रति राष्ट्रिय स्वतन्त्र पार्टी (रास्वपा) ले भने तत्कालै नियमापत्ति जनाउँदै गम्भीर आपत्ति प्रकट गरेको छ।
बुधबारको बैठकमा विशेष समय लिएर बोल्दै कांग्रेस सांसद यादवले सभामुख अर्याल सिंगो सदनको अभिभावक बन्न नसकेको आरोप लगाए। उनले संसद्को गरिमा र तटस्थता कायम राख्न सभामुख चुकेको टिप्पणी गरे।
बैठकमा बोल्दै सांसद यादवले भने:
"मलाई सभामुखसँग प्रश्न छ। यो गरिमामय कुर्सीमा बस्नुपहिला यहाँ एउटा पार्टीमा आबद्ध हुनुहुन्थ्यो। के सभामुख महोदयले अहिलेसम्म पहिलेको जुन पार्टी थियो— रास्वपा, त्योसँगको नाभि काट्न सक्नुभएको छैन कि के हो? यहाँले सम्पूर्ण सदनको अभिभावकको रूपमा यसको सम्मान बढाउने हो।"
सांसद यादवले सभामुखको निष्पक्षतामाथि प्रश्न उठाउँदै पूर्व पार्टीको प्रसंग निकालेपछि राष्ट्रिय स्वतन्त्र पार्टी (रास्वपा) का सांसदहरूले नियमापत्ति गरेका थिए। रास्वपाका सांसदहरूले नियमावलीअनुसार सभामुखको आचरण र तटस्थतामाथि यसरी प्रश्न उठाउन नमिल्ने भन्दै यादवको अभिव्यक्तिप्रति कडा आपत्ति जनाएका हुन्।
रास्वपाको आपत्तिपछि संसद् बैठकमा केही बेर भनाभन र तनावको स्थिति सिर्जना भएको थियो।
