असार ३, २०८३
प्रतिनिधिसभाको बुधबारको बैठकमा विनियोजन विधेयकमाथिको छलफलका क्रममा श्रम संस्कृति पार्टीका सांसदहरूले संसद्को वेल घेराउ गरेका छन्।
उद्योग, वाणिज्य तथा आपूर्ति मन्त्री गौरीकुमारी यादवले सासंदहरूले उठाएका प्रश्नको दिएको जवाफ चित्तबुझ्दो नभएको र पुन: प्रतिप्रश्न गर्न पाउनुपर्ने माग गर्दै उनीहरूले वेल घेराउ गरेका हुन्।
विनियोजन विधेयकअन्तर्गत उद्योग, वाणिज्य तथा आपूर्ति मन्त्रालयको शीर्षकमा सांसदहरूले उठाएका प्रश्नको मन्त्री यादवले संसद्मा जवाफ दिएकी थिइन्। मन्त्रीको जवाफपछि श्रम संस्कृति पार्टीका अध्यक्ष एवं सांसद हर्क साम्पाङले प्रतिप्रश्न गरेका थिए।
तर, मन्त्रीबाट आएको स्पष्टीकरण चित्तबुझ्दो नभएको भन्दै उनले फेरि प्रश्न गर्न पाउनुपर्ने माग राख्दै उठेर विरोध जनाएका थिए।
सांसद साम्पाङले उठेर निरन्तर विरोध गरिरहँदा सभामुख डोलप्रसाद अर्यालले संसद्को नियमावलीअनुसार प्रतिप्रश्नमाथि पुन: प्रतिप्रश्न गर्ने व्यवस्था नरहेको जानकारी गराएका थिए। सभामुख अर्यालले साम्पाङलाई आफ्नो स्थानमा बस्न र संसद्को प्रक्रियालाई अगाडि बढाउन सहयोग गर्न पटक-पटक आग्रह गरे पनि साम्पाङले आफ्नो अडान कायम राखेका थिए।
साम्पाङले विरोध जारी राखेकै अवस्थामा सभामुखले संसद्को कार्यसूची र प्रक्रियालाई अगाडि बढाउन खोजेपछि श्रम संस्कृति पार्टीका सांसदहरू वेलतर्फ अघि बढेका थिए।
सांसदहरूले वेल घेराउ गरेर नाराबाजी सुरु गरेपछि सभामुख अर्यालले संसद्को विधि, मर्यादा र नियमावली नमिच्न चेतावनी दिएका थिए।
"संसद् नियमावली र स्थापित विधिअनुसार चल्नुपर्छ। नियम उल्लंघन गरेर प्रक्रिया अवरुद्ध नगर्नुस्," सभामुख अर्यालले चेतावनी दिँदै भने।
सभामुखको चेतावनीका बाबजुद श्रम संस्कृति पार्टीका सांसदहरूले समाचार तयार पार्दासम्म वेल घेराउ र विरोध प्रदर्शनलाई जारी राखेका छन्, जसका कारण प्रतिनिधिसभा बैठकको वातावरण तनावग्रस्त बनेको छ।
