असार १, २०८३
काठमाडौँ । नेकपा एमालेकी सचिव एवं संसदीय दलकी उपनेता पद्मा अर्यालले अर्थमन्त्री डा. स्वर्णिम वाग्लेको संसदीय अभिव्यक्तिप्रति तीव्र आपत्ति जनाएकी छन्। प्रतिनिधि सभाको बैठकमा बोल्दै उपनेता अर्यालले सरकारका जिम्मेवार मन्त्रीहरूले संसद्मै 'काण्डका फाइल खोल्छु' भन्दै जनप्रतिनिधिहरूलाई धम्की दिएको भन्दै आक्रोश व्यक्त गरेकी हुन्।
आर्थिक वर्ष २०८३/०८४ को राजस्व र व्ययको वार्षिक अनुमानमाथि भइरहेको सामान्य छलफलका क्रममा संसद्मा सत्तापक्ष र प्रतिपक्षबीच निकै चर्काचर्की परेको छ।
यसअघि बजेट वक्तव्य र करका दर हेरफेरको विषयलाई लिएर प्रतिपक्षी सांसदहरूले सूचना चुहावटमा अर्थमन्त्री डा. स्वर्णिम वाग्लेको संलग्नता रहेको आशंका गर्दै संसदीय छानबिन समितिको माग गरेका थिए। सांसदहरूको प्रश्नको जवाफ दिने क्रममा मन्त्री वाग्लेले आक्रामक रूपमा प्रस्तुत हुँदै प्रतिपक्षी नेताहरूलाई कडा चेतावनी दिएका थिए। संसद्को रेकर्डमा मन्त्री वाग्लेले भनेका थिए:
"दुई अर्ब होइन, दुई रुपैयाँ बेइमानी मबाट भएको छ भने म मन्त्री पद त्याग्छु। यो नैतिक आँट र उचाइ मप्रति औँला ठड्याउनेहरूलाई पनि प्राप्त होस्, शुभकामना छ। तपाईंका काण्डबारे हामी अनभिज्ञ हौँ र ? ती पनि खुल्नेछन्।"
अर्थमन्त्रीको सोही प्रहारको प्रतिवाद गर्दै एमाले उपनेता अर्यालले संसद्मै उभिएर सरकारलाई तत्काल फाइल खोल्न चुनौती दिएकी हुन्। "सांसदलाई काण्डको फाइल खोल्छु भन्दै संसदीय मर्यादामाथिको अपमान नगर्न म चेतावनी दिन चाहन्छु," अर्यालले भनिन्, "फाइल खोल्छु भनेर विपक्षीको आवाज दबाउन खोजिएको हो? कुन-कुन फाइल खोल्ने हो तत्काल खोल्न आग्रह गर्दछु। प्रतिपक्ष डराउँदैन।"
यसका साथै उनले प्रधानमन्त्री बालेन शाहले भारत भ्रमणका क्रममा नेपाल-भारत सीमा सम्बन्धी दिएको अभिव्यक्ति संसद्को रेकर्ड (रोष्टम) बाट हटाउनुपर्ने माग एमालेले निरन्तर उठाइरहने स्पष्ट पारिन्।
उपनेता अर्यालले हालै सम्पन्न भारत भ्रमणका क्रममा परराष्ट्रमन्त्री शिशिर खनालले भारतीय समकक्षीसँगको भेटमा व्यक्त गरेको भनिएको 'अतीतको बोझ बोक्न सक्दैनौँ' भन्ने शब्दावलीप्रति पनि कडा आपत्ति जनाउँदै सरकारसँग आधिकारिक जवाफ मागिन्।
संसद्मा व्यङ्ग्यात्मक शैलीमा बोल्दै उनले भनिन्:
"परराष्ट्रमन्त्रीले भारत भ्रमणका क्रममा इतिहासको बोझ बोक्न नसक्ने बताउनुभएको कुरा बाहिर आएको छ। यो त 'पारी बाघ कराएको यता बाख्रो हराएको' जस्तो भयो। अतीतको बोझ बोक्न सक्दैनौँ भनेर कुन विषय भन्न खोज्नुभएको हो? राष्ट्रिय स्वाधीनता र इतिहासका सन्धि-सम्झौताका विषयमा के भन्न खोजिएको हो, त्यसको स्पष्ट जवाफ चाहिन्छ।"
करका दर, बजेट विवाद, प्रधानमन्त्री र परराष्ट्रमन्त्रीका वैदेशिक अभिव्यक्तिहरूका कारण पछिल्लो समय प्रतिनिधि सभाको बैठक निकै तातिरहेको छ।
