असार १, २०८३
काठमाडौँ । राष्ट्रपति रामचन्द्र पौडेलले सङ्घीय लोकतान्त्रिक गणतन्त्रका लागि नेपाली जनताले गरेको सङ्घर्ष र बलिदानको वास्तविक चाहना सुशासन र तीव्र विकास नै भएको बताएका छन्। लोकसेवा आयोगको ७६ औँ वार्षिकोत्सवका अवसरमा आयोजित विशेष समारोहलाई सम्बोधन गर्दै राष्ट्रपति पौडेलले सो कुरा बताएका हुन्।
जनताको अभिलाषा पूरा गर्न राज्य संयन्त्रलाई समयानुकूल जनमुखी, सेवामुखी, प्रविधिमैत्री र परिणाममुखी बनाउनु आजको प्रमुख आवश्यकता रहेको उनले स्पष्ट पारे।
समारोहलाई सम्बोधन गर्दै राष्ट्रपति पौडेलले कर्मचारीतन्त्रको कार्यशैलीमा सुधार ल्याउनुपर्नेमा जोड दिए। "स्वउत्प्रेरित, अनुशासित, आचरणशील, नैतिकवान र जिम्मेवार कर्मचारीले मात्र राज्यको भूमिकालाई परिणाममुखी बनाउन सक्छन्," उनले भने, "प्रविधि र स्मार्ट सेवा प्रवाहमार्फत कर्मचारीतन्त्रले नागरिकको मन जित्न सक्नुपर्दछ। यसले नै लोकतन्त्रमा जनताको हित हुन्छ भन्ने भरोसालाई अभिवृद्धि गर्दछ।"
विगत साढे सात दशकदेखि लोकसेवा आयोगले कायम राखेको 'योग्यता, निष्पक्षता र स्वच्छता' को सिद्धान्तको प्रशंसा गर्दै राष्ट्रपति पौडेलले यसको साखलाई अझ सुदृढ बनाउनुपर्ने उल्लेख गरे। संविधानले अङ्गीकार गरेको समावेशी लोकतन्त्रको मर्म अनुरूप स्थापित योग्यता प्रणालीको रक्षा गर्नु र यसको जगलाई थप मजबुत बनाउनु आजको चुनौती रहेको उनको भनाइ थियो।
"आयोगप्रतिको भरोसा र विश्वासका कारण नै आज मेहनती युवाहरूले लोकतान्त्रिक शासन व्यवस्थामा आफ्नो भविष्य सुरक्षित देख्न पाएका छन्। यो अटुट विश्वास नै आयोगको सबैभन्दा ठूलो सम्पत्ति हो।" - राष्ट्रपति रामचन्द्र पौडेल
आयोगको कार्यक्षेत्र विस्तार भइरहेको सन्दर्भमा कार्य सम्पादनलाई अझ वैज्ञानिक, व्यवस्थित र गुणस्तरीय बनाउनुपर्ने चुनौती रहेको उनले औँल्याए। सरकारी सेवामा सदैव असल र उम्दा जनशक्ति भर्ना गर्नका लागि समयसापेक्ष परीक्षण विधि र आधुनिक प्रविधि अवलम्बन गर्न उनले आयोगलाई सुझाव दिए।
राष्ट्रपति पौडेलले वार्षिकोत्सवको यस घडीमा विगतका कामको गम्भीर समीक्षा गर्दै आगामी चुनौतीहरूलाई सामना गर्ने गरी ठोस योजना तय गर्न लोकसेवा आयोगको ध्यानाकर्षण समेत गराए।
