जेष्ठ ३१, २०८३
काँकडभिट्टा, झापा
झापाको पूर्वी नाका काँकडभिट्टा सीमा क्षेत्रबाट अनधिकृत रूपमा नेपाल प्रवेश गर्न खोज्ने एक बंगलादेशी नागरिकलाई प्रहरीले पक्राउ गरेको छ।
मेचीनगर नगरपालिका–६ स्थित गैरीगाउँ इलाकाबाट भारतको पानीट्याङ्की हुँदै मेची खोलाको बाटो भएर नेपालतर्फ आउँदै गरेको अवस्थामा ती विदेशी नागरिक पक्राउ परेका हुन्।
जिल्ला प्रहरी कार्यालय झापाका अनुसार पक्राउ पर्नेमा बंगलादेशको राहदानी (Passport) बोकेका ३३ वर्षीय मोहम्मद सैफुल इस्लाम रहेका छन्। उनी बंगलादेशको तुलाटोली कचुआ मनोहरपुर–३६३० चाँदपुरका बासिन्दा हुन्।
सीमा क्षेत्रमा शंकास्पद रूपमा हिँडिरहेको अवस्थामा इलाका प्रहरी कार्यालय काँकडभिट्टाबाट खटिएको विशेष प्रहरी टोलीले उनलाई नियन्त्रणमा लिएको थियो। पक्राउ परेका इस्लामलाई आवश्यक कानुनी कारबाही र थप अनुसन्धानका लागि बसमार्फत अध्यागमन विभाग, काठमाडौँ पठाइएको झापा प्रहरीले जनाएको छ।
पछिल्लो समय भारतको पश्चिम बंगालमा भारतीय जनता पार्टी (भाजपा) को सरकार बनेसँगै त्यहाँ लुकीछिपी बस्दै आएका बंगलादेशी र रोहिंगिया नागरिकहरूमाथि कडा निगरानी र धरपकड सुरु भएको छ। भारतमा कडा सुरक्षा रणनीति अपनाइएपछि त्यहाँ रहेका अवैध नागरिकहरूले नेपाल-भारत खुला सीमाको फाइदा उठाउँदै नेपाल छिर्ने प्रयास गरिरहेका छन्।
प्रहरी प्रशासनको रणनीति: बंगलादेशी र रोहिंगिया नागरिकहरूको सम्भावित घुसपैठलाई मध्यनजर गर्दै झापा प्रहरी प्रशासनले नेपाल–भारत सीमा क्षेत्रमा आफ्नो गुप्तचरी र गस्ती बढाएको छ। सीमा नाकाहरूमा अवैध प्रवेश रोक्न सुरक्षा निकायहरूलाई 'हाई अलर्ट' मा राखिएको र उच्च निगरानी भइरहेको प्रशासनले जनाएको छ।
