जेष्ठ ३०, २०८३
काठमाडौं । फिफा विश्वकप २०२६ अन्तर्गत समूह 'बी' को आफ्नो पहिलो खेलमा घरेलु टोली क्यानडाले बोस्निया एन्ड हर्जगोभिनासँग अंक बाँडेको छ । टोरोन्टो स्टेडियममा भएको निकै प्रतिस्पर्धात्मक र रोमान्चक खेलमा सुरुवाती अग्रता जोगाउन नसक्दा बोस्निया एन्ड हर्जगोभिना क्यानडासँग १–१ गोलको बराबरीमा रोकिएको हो ।
खेलको सुरुवाती समयदेखि नै घरेलु मैदान र दर्शकको साथ पाएको क्यानडाले बल पोजिसन (Ball Possession) मा पकड जमाए पनि पहिलो हाफमा अवसरको सदुपयोग भने बोस्नियाले गर्यो ।
पहिलो गोल: खेलको २१ औं मिनेटमा बोस्नियाका लागि जोभो लुकिचले उत्कृष्ट गोल गरे । कर्नरमार्फत आएको बललाई उनले आकर्षक हेडरमार्फत जाली चुमाउँदै टोलीलाई १-० को सुरुवाती अग्रता दिलाएका थिए ।
क्यानडाले पहिलो हाफमा बल नियन्त्रणमा राख्दै केही राम्रा अवसरहरू सिर्जना गरे पनि फिनिसिङमा चुक्दा बराबरी गर्ने मौका गुमायो ।
दोस्रो हाफको सुरुवातमै क्यानडा थप आक्रामक रूपमा प्रस्तुत भयो । खेलको ४७ औं मिनेटमा क्यानडाका फरवार्डले उत्कृष्ट फुटवर्क देखाउँदै प्रहार गरे पनि त्यो गोलमा परिणत हुन सकेन । ५२ औं मिनेटमा क्यानडाको अर्को एउटा कडा प्रहार बोस्नियाका गोलकिपरले सहजै बचाए । ५३ औं र ५४ औं मिनेटमा दुवै टोलीले सुवर्ण अवसरहरू गुमाएका थिए ।
लगातार आक्रमण गरे पनि फिनिसिङ लाइनमा कमजोरी देखिएपछि खेलको ६१ औं मिनेटमा क्यानडाले आफ्नो रणनीति परिवर्तन गर्दै 'अट्याकिङ एरिया'का ३ खेलाडी एकैपटक परिवर्तन गर्यो । सोही समयमा बोस्नियाले पनि आफ्नो रक्षापंक्ति मजबुत बनाउन २ खेलाडी परिवर्तन गरेको थियो । ६६ औं मिनेटमा बोस्नियाका डिफेन्डरहरूले उत्कृष्ट बचाउ गर्दै क्यानडाको प्रहार विफल पारिदिए ।
क्यानडाका मुख्य प्रशिक्षकको खेलाडी परिवर्तन गर्ने निर्णय खेलको ७९ औं मिनेटमा सही साबित भयो ।
प्रतिस्थापित खेलाडीका रूपमा मैदान प्रवेश गरेका कायल लरिनले बोस्नियाका दुई डिफेन्डरको बीचबाट उत्कृष्ट टर्न लिँदै प्रहार गरेको बल गोलमा परिणत भयो र क्यानडा खेलमा १-१ को बराबरीमा फर्कियो ।
खेलको अन्तिम समय र इन्जुरी समयको ९०+५ मिनेटमा पनि क्यानडाले गोल गर्ने केही सुनौला मौकाहरू बनाएको थियो । तर, बोस्नियाका डिफेन्डरहरूले क्यानडाका नायक लरिनलाई रोक्दै खेल १-१ को बराबरीमै टुङ्ग्याउन सफल भए र दुवै टोलीले १–१ अंक बाँडे ।
