जेष्ठ १९, २०८३
काठमाडौँ । नेकपा (एमाले) का सांसद गुरु बरालले नेपाल–भारत सीमा विवादका विषयमा प्रधानमन्त्री बालेन शाहले दिएको अभिव्यक्तिले मुलुक नै गम्भीर अप्ठेरोमा पर्न सक्ने चेतावनी दिनुभएको छ। मंगलबार संसद् भवन नयाँ बानेश्वरमा सञ्चारकर्मीहरूसँग कुराकानी गर्दै सांसद बरालले प्रतिपक्ष दलहरू प्रधानमन्त्रीको जिम्मेवारपूर्ण जवाफको प्रतीक्षामा रहेको स्पष्ट पार्नुभयो।
सांसद बरालले राष्ट्रिय स्वाधीनता र सीमा जस्तो संवेदनशील विषयमा गलत सूचना दिएर देशलाई भ्रमित पार्ने काम कसैबाट हुन नहुने बताउनुभयो। देशको अस्मितामाथि नै प्रश्न उठ्ने यस्ता गम्भीर अवस्था आउन दिन नहुने भन्दै उहाँले राष्ट्रिय हितका सवालमा कार्यकारी प्रमुख सधैँ जवाफदेही हुनुपर्नेमा जोड दिनुभयो।
सभामुखलाई सुझाव: 'विपक्षीलाई पेलेर जबरजस्ती सदन चलाउन खोजे दुर्घटना हुन्छ' कुराकानीका क्रममा सांसद बरालले प्रधानमन्त्रीको अभिव्यक्तिको विरोधमा प्रतिपक्ष आन्दोलित भइरहेका बेला संसद्को कार्यसूची जबरजस्ती अघि बढाउन खोज्ने सभामुख डोलप्रसाद अर्यालको कदमको समेत आलोचना गर्नुभयो। प्रतिपक्षको विरोध र मागलाई बेवास्ता गर्दै सदन चलाउने सभामुखको प्रयास उचित नभएको उहाँको भनाइ थियो।
सांसद बरालले संसद् सञ्चालन र गतिरोध अन्त्यका लागि जिम्मेवार बन्न सभामुख अर्याललाई सुझाव दिनुभयो। "विपक्षी दलहरूको जायज मागलाई पेलेर यदि जबरजस्ती सदन चलाउन खोजियो भने संसद्भित्र थप दुर्घटना र अप्रिय स्थिति निम्तिन सक्छ," बरालले चेतावनी दिँदै भन्नुभयो।
प्रधानमन्त्रीको सीमासम्बन्धी विवादित अभिव्यक्तिलाई लिएर एमालेसहितका विपक्षी दलहरूले लगातार संसद् अवरुद्ध गर्दै आएका छन्, जसका कारण पछिल्लो समय संसदीय व्यवस्था र कार्यसूचीहरू नराम्ररी प्रभावित भएका छन्।
