जेष्ठ ७, २०८३
वीरगन्ज । पर्साको वीरगन्जस्थित एउटा विद्यालयमा कक्षा चलिरहेकै बेला सिलिङ फ्यान खस्दा ७ जना विद्यार्थी घाइते भएका छन्। पठनपाठन भइरहेको अवस्थामा अचानक छतमा झुण्डिएको फ्यान खसेपछि कक्षाकोठामा भागदौड मच्चिएको थियो।
प्राप्त जानकारी अनुसार, फ्यानको पत्तीले काट्दा र फ्यानको वजनले थिचिँदा विद्यार्थीहरूको टाउको, हात र शरीरका विभिन्न भागमा चोट लागेको छ। घाइते विद्यार्थीहरूमध्ये केहीको अवस्था गम्भीर रहेको र उनीहरूलाई तत्काल उपचारका लागि नजिकैको अस्पतालमा पुर्याइएको छ।
प्रत्यक्षदर्शी र अभिभावकहरूका अनुसार विद्यालय प्रशासनले समयमै विद्युतीय उपकरण र पंखाहरूको मर्मतसम्भार नगर्दा यो दुर्घटना भएको हो। "पङ्खा धेरै पुरानो थियो र हल्लिने गर्थ्यो, तर कसैले ध्यान दिएनन्," एक अभिभावकले गुनासो गरे।
तस्बिरमा देखिए अनुसार, फ्यान खसेपछि विद्यार्थीहरू रगताम्मे अवस्थामा देखिएका छन् भने कक्षाकोठामा रहेका डेस्क–बेन्चमा रगतका टाटा प्रष्ट देखिन्छन्। यो घटनाले विद्यालयमा बालबालिकाको सुरक्षामाथि गम्भीर प्रश्न उठाएको छ।
घटनापछि आक्रोशित बनेका अभिभावक र स्थानीयबासीले विद्यालय व्यवस्थापन समितिको लापरबाहीप्रति कडा विरोध जनाएका छन्। उनीहरूले घटनाको सत्यतथ्य छानबिन गरी दोषीमाथि कारबाही गर्न र घाइते विद्यार्थीहरूको सम्पूर्ण उपचार खर्च विद्यालयले व्यहोर्नुपर्ने माग गरेका छन्।
प्रहरीले घटनाबारे जानकारी पाएलगत्तै विद्यालय पुगेर थप अनुसन्धान सुरु गरेको जनाएको छ।
