जेष्ठ २, २०८३
काठमाडौँ । नेपाललाई ट्रान्जिट बनाएर अवैध रूपमा युरोपेली मुलुकहरू छिर्न खोज्ने दुई जना बंगलादेशी नागरिकलाई अध्यागमन विभागले नियन्त्रणमा लिएको छ। राहदानी दुरुपयोग तथा किर्ते गरेको अभियोगमा उनीहरूमाथि विभागले हिरासतमा राखेर विस्तृत अनुसन्धान गरिरहेको छ।
पक्राउ पर्नेहरूमा मोहम्मद बेलाल हुसेन र मेहेदी हसन रहेका छन्। उनीहरूले अन्तर्राष्ट्रिय मानव तस्कर (एजेन्ट) को प्रलोभनमा परी नक्कली कागजात बनाएर नेपालको बाटो प्रयोग गर्न खोजेका थिए।
गत वैशाख १० गते त्रिभुवन अन्तर्राष्ट्रिय विमानस्थलस्थित अध्यागमन कार्यालयले मोहम्मद बेलाल हुसेनलाई पक्राउ गरेको हो। हुसेन बेलायतको नक्कली राहदानी प्रयोग गरी ढाकाबाट नेपाल आएका थिए।
यसरी खुल्यो पोल: नेपाल ओर्लिएपछि भिसा लिनका लागि आवश्यक शुल्क बुझाएर उनी अध्यागमन अधिकारीसमक्ष पुगेका थिए। तर, सोधपुछका क्रममा उनको शङ्कास्पद हाउभाउ देखेपछि अधिकारीहरूले केरकार सुरु गरे। अध्यागमनको केरकारबाट डराएका हुसेनले अन्ततः आफूसँग बंगलादेशको वास्तविक राहदानी पनि रहेको स्वीकार गरे।
भारतीय एजेन्टको संलग्नता: अनुसन्धानका क्रममा बंगलादेशमा आएको राजनीतिक परिवर्तनपछि व्यापार व्यवसाय धराशयी भएर परिवार पाल्न गाह्रो भएपछि उनी युरोप जान तयार भएको खुलेको छ। उनलाई ढाकामै एक भारतीय एजेन्टले बेलायतको नक्कली राहदानी थमाइदिएका थिए। एजेन्टले उनलाई नेपाल हुँदै सुरुमा मध्यपूर्व (खाडी मुलुक) जाने र त्यहाँ केही दिन बसेर युरोप छिर्ने योजना बनाएका थिए। हुसेनले भने आफूलाई उक्त राहदानी नक्कली भएको थाहा नभएको दाबी गरिरहेका छन्।
राहदानी किर्ते गर्ने अर्का बंगलादेशी नागरिक मेहेदी हसन वैशाख १५ गते पक्राउ परेका हुन्। उनले बंगलादेशको साधारण राहदानीलाई किर्ते गरेर 'अफिसियल' (सरकारी) राहदानीमा बदल्ने प्रयास गरेका थिए।
ठमेलमा भयो किर्तेको 'सेटिङ': हसन बंगलादेशको साधारण राहदानीमै नेपाल आएका थिए। तर, नेपाल आइसकेपछि काठमाडौँको ठमेलमा बस्ने अर्का एक बंगलादेशी एजेन्टको सहयोगमा उनले आफ्नो राहदानीलाई अफिसियलमा परिवर्तन गराए। बंगलादेशका एजेन्टले उनलाई ठमेलका ती व्यक्तिसँग सम्पर्क गराइदिएका थिए।
टर्की छिर्ने दाउ: सरकारी अधिकारीहरूले प्रयोग गर्ने अफिसियल राहदानी भएमा टर्कीले सहजै भिसा दिने प्रलोभन एजेन्टले हसनलाई दिएका थिए। एजेन्टको सोही सल्लाह र आश्वासनपछि हसन सरकारी जागिरे नभए पनि आफ्नो राहदानी किर्ते गर्न राजी भएका थिए। तर, अध्यागमन विभागको फन्दामा परेपछि उनको टर्की पुग्ने सपना अधुरै रह्यो।
अध्यागमन विभागले दुवै बंगलादेशी नागरिकमाथि जाली राहदानी र किर्ते कसुर अन्तर्गत अनुसन्धान अघि बढाएको छ। पछिल्लो समय नेपाललाई ट्रान्जिट बनाएर अवैध रूपमा तेस्रो मुलुक मानव तस्करी गर्ने गिरोह सक्रिय रहेको आशंकामा प्रहरी र अध्यागमनले ठमेल तथा विमानस्थल क्षेत्रमा निगरानी बढाएको छ।
