बैशाख २८, २०८३
शिक्षा, विज्ञान तथा प्रविधिमन्त्री सस्मित पोखरेल र संयुक्त राष्ट्रसङ्घकी नेपालस्थित आवासीय संयोजक लीला पिटर्स याहिया नेतृत्वको प्रतिनिधिमण्डलबीच आज शिष्टाचार भेटवार्ता भएको छ। सिंहदरबारस्थित मन्त्रालयमा भएको उक्त भेटमा नेपालको शिक्षा क्षेत्रको विकास र द्विपक्षीय हितका विविध पक्षमा छलफल भएको छ।
भेटका अवसरमा राष्ट्रसङ्घअन्तर्गतका युनिसेफ (UNICEF), विश्व खाद्य कार्यक्रम (WFP), जनसङ्ख्या कोष (UNFPA), र अन्तर्राष्ट्रिय आप्रवासन सङ्गठन (IOM) का प्रतिनिधिहरूको सहभागिता थियो।
समावेशी र प्रविधिमैत्री शिक्षा: युनिसेफसँगको सहकार्यमा समावेशी शिक्षा, 'इभिडेन्स बेस्ड लर्निङ', र दिगो विकास लक्ष्य हासिल गर्न प्रविधिको प्रयोग बढाउने विषयमा कुराकानी भएको छ।
दिवा खाजा र स्थानीय उत्पादन: विश्व खाद्य कार्यक्रमअन्तर्गत विद्यालयमा दिइने दिवा खाजालाई पोषिलो बनाउन स्थानीय कृषकका उत्पादनलाई जोड्ने योजनाबारे छलफल भएको छ।
विद्यार्थीको मानसिक स्वास्थ्य: विदेशमा अध्ययनरत नेपाली विद्यार्थीहरूको मानसिक स्वास्थ्य र सुरक्षित बसाइँसराइका विषयमा IOM सँग सहकार्य गर्नेबारे मन्त्री पोखरेलले चासो व्यक्त गर्नुभयो।
यौनिक शिक्षा र डिजिटल लर्निङ: UNFPA मार्फत सञ्चालित बृहत् यौनिक शिक्षा र डिजिटल सिकाइका कार्यक्रमहरूलाई थप प्रभावकारी बनाउने विषयमा पनि मन्त्रालय र नियोगबीच सहमति देखिएको छ।
शिक्षामन्त्री पोखरेलले राष्ट्रसङ्घीय नियोगहरूले नेपालको शिक्षा क्षेत्रमा पुर्याउँदै आएको सहयोगको प्रशंसा गर्दै आगामी दिनमा शिक्षकको पेसागत विकास र डिजिटल लर्निङमा थप लगानी र सहकार्य आवश्यक रहेको बताउनुभयो।
"मन्त्रालय अब समावेशी शिक्षा र विज्ञान-प्रविधिको एकीकृत प्रयोगमा केन्द्रित हुन चाहन्छ। यसका लागि राष्ट्रसङ्घीय निकायहरूको थप सहयोग र समन्वय अपेक्षित छ," मन्त्री पोखरेलले भन्नुभयो।
आवासीय प्रतिनिधि लीला पिटर्स याहियाले शिक्षा क्षेत्र संयुक्त राष्ट्रसङ्घको उच्च प्राथमिकतामा रहेको उल्लेख गर्दै नेपालको शैक्षिक सुधारका प्रयासमा निरन्तर साथ दिने प्रतिबद्धता जनाउनुभयो। यस भेटले नेपालको शिक्षा प्रणालीलाई आधुनिक र समावेशी बनाउन अन्तर्राष्ट्रिय साझेदारहरूसँगको सम्बन्धलाई थप मजबुत बनाएको मन्त्रालयको सचिवालयले जनाएको छ।
