बैशाख ५, २०८३
काठमाडौँ । सम्पत्ति शुद्धीकरण अनुसन्धान विभागको हिरासतमा रहेका विवादास्पद बिचौलिया दिपक भट्टका मुख्य सहयोगी मानिने भारतीय नागरिक उपेन्द्र हिरावत वैदेशिक पलायन भएका छन्। भट्ट पक्राउ परेलत्तै अनुसन्धानको घेरामा रहेका हिरावत भारत हुँदै हङकङ पुगेको स्रोतले पुष्टि गरेको छ।
भट्टको 'दायाँ हात' मानिने हिरावत विभिन्न कम्पनीहरूमा सेयर होल्डरसमेत रहेका छन्। उनले भट्टको वित्तीय कारोबार र व्यवस्थापनमा प्रत्यक्ष भूमिका निर्वाह गर्दै आएको विभागको प्रारम्भिक ठम्याइ छ।
अनुसन्धानका क्रममा हिरावतको नाममा हङकङमा ठुलो मात्रामा चल–अचल सम्पत्ति रहेको भेटिएको छ। भट्ट समूहले अवैध रूपमा आर्जित धनलाई विभिन्न देशमा व्यवस्थापन गर्न हिरावतलाई प्रयोग गरेको हुनसक्ने देखिएपछि विभागले सो दिशामा अनुसन्धान केन्द्रित गरेको छ।
सम्पत्ति शुद्धीकरण अनुसन्धान विभाग र सम्बन्धित सुरक्षा निकायको प्रारम्भिक प्रतिवेदन अनुसार यस समूहको लगानी र सम्पत्ति निम्न स्थानहरूमा रहेको संकेत फेला परेको छ:
हङकङ र सिंगापुर: मुख्य वित्तीय व्यवस्थापन र बैंकिङ कारोबार।
दुबई र बैंकक: घरजग्गा तथा स्थायी सम्पत्ति जोडेको आशंका।
यसले यो प्रकरण केवल आन्तरिक मात्र नभई एक वृहत् बहु–देशीय सम्पत्ति शुद्धीकरण (Money Laundering) सञ्जालसँग जोडिएको आशंकालाई थप बलियो बनाएको छ।
मुख्य सहयोगी नै फरार भएपछि अनुसन्धान प्रभावित हुन सक्ने जोखिमलाई मध्यनजर गर्दै प्रहरी र सम्बन्धित निकायले अन्तर्राष्ट्रिय समन्वयको तयारी थालेका छन्। हिरावत फरार भए पनि उनले सञ्चालन गरेका कम्पनीहरू र तिनको वित्तीय विवरणमाथि विभागले सुक्ष्म निगरानी बढाएको छ।
सम्पत्ति शुद्धीकरण विभागले यस प्रकरणमा संलग्न अन्य व्यक्तिहरू र विदेशमा रहेको सम्पत्तिको पूर्ण विवरण संकलन गर्न प्रक्रिया अघि बढाइएको जनाएको छ।
