बैशाख ४, २०८३
नवनियुक्त परराष्ट्रमन्त्री माननीय शिशिर खनालसँग नेपालका लागि जर्मनीका राजदूत महामहिम उडो युजेन भोल्जले आज शिष्टाचार भेटवार्ता गर्नुभएको छ।
परराष्ट्र मन्त्रालयमा भएको उक्त भेटका क्रममा राजदूत भोल्जले जर्मनीका संघीय विदेशमन्त्री महामहिम डा. जोहान डेभिड वाडेफुलका तर्फबाट मन्त्री खनाललाई परराष्ट्रमन्त्रीमा नियुक्त हुनुभएकोमा हार्दिक बधाई तथा शुभकामना सन्देश हस्तान्तरण गर्नुभयो।
भेटका अवसरमा नेपाल र जर्मनीबीचको दशकौँ पुरानो द्विपक्षीय सम्बन्धलाई अझ सुदृढ बनाउने विषयमा गहन छलफल भएको थियो। मन्त्री खनाल र राजदूत भोल्जबीच विकास सहायता, वैदेशिक लगानी, जलवायु परिवर्तनका चुनौतीहरू र आपसी हितका विविध पक्षमा सहकार्य बढाउनेबारे कुराकानी भएको मन्त्रालयले जनाएको छ।
सो क्रममा परराष्ट्रमन्त्री खनालले नेपालको सामाजिक-आर्थिक विकासमा जर्मनीले पुर्याउँदै आएको निरन्तर सहयोगका लागि धन्यवाद व्यक्त गर्नुभयो। राजदूत भोल्जले नेपालको नवीकरणीय ऊर्जा, दिगो पर्यटन र प्राविधिक शिक्षाका क्षेत्रमा जर्मनीको सहयोग जारी रहने प्रतिबद्धता जनाउनुभयो।
नेपालले सन् २०२६ मा अल्पविकसित मुलुक (LDC) बाट स्तरोन्नति हुने लक्ष्य राखेको सन्दर्भमा युरोपेली युनियन र जर्मनीसँगको व्यापारिक एवं कूटनीतिक साझेदारीलाई थप प्रभावकारी बनाउने विषयमा समेत दुई पक्षबीच सकारात्मक छलफल भएको छ।
