फाल्गुन २६, २०८२
@सुनिल सिंह दोहा
— शेख मोहम्मद बिन अब्दुलरहमान अल थानी, कतार का प्रधानमन्त्री तथा विदेशमन्त्रीले इरानबाट कतारी भूभागतर्फ गरिएको भनिएको मिसाइल र ड्रोन आक्रमणको कडा शब्दमा निन्दा गरेका छन्। उनले यसलाई कतारको सार्वभौमिकतामाथिको स्पष्ट उल्लङ्घन र सम्पूर्ण क्षेत्रीय स्थायित्वका लागि गम्भीर खतरा भएको बताएका छन्।सोमबार आयोजित संयुक्त भर्चुअल शिखर सम्मेलनलाई सम्बोधन गर्दै उनले उक्त टिप्पणी गरेका हुन्। उक्त सम्मेलनमा गल्फ कोअपरेशन काउन्सिल (GCC) का सदस्य राष्ट्रहरू, अन्य क्षेत्रीय मुलुकहरू तथा युरोपेली संघ का प्रतिनिधिहरू सहभागी थिए। सम्मेलनमा मध्यपूर्व क्षेत्रमा बढ्दो तनाव, सुरक्षा चुनौती तथा ऊर्जा बजारमा पर्ने सम्भावित प्रभावबारे विस्तृत छलफल भएको बताइएको छ।प्रधानमन्त्री अल थानीले कतारमाथि भएको आक्रमण अन्तर्राष्ट्रिय कानुन र कूटनीतिक मान्यताविपरीत भएको उल्लेख गर्दै यसले सम्पूर्ण क्षेत्रलाई अस्थिर बनाउने खतरा बढाएको बताए। उनले कतारका सशस्त्र बलहरूले परिस्थितिलाई सफलतापूर्वक सामना गरेको भन्दै उनीहरूको तत्परता र क्षमताको प्रशंसा पनि गरे।“कतारको सार्वभौमिकतामाथि भएको यस्तो आक्रमण अस्वीकार्य छ। यसले क्षेत्रीय सुरक्षामा गम्भीर चुनौती खडा गरेको छ,” उनले भने।
भर्चुअल सम्मेलनमा सहभागी नेताहरूले मध्यपूर्व क्षेत्रमा पछिल्लो समय बढ्दै गएको सैन्य गतिविधि र आक्रमणहरूको शृंखलाप्रति चिन्ता व्यक्त गरेका थिए। कतारका प्रधानमन्त्रीले हालका घटनाक्रमले क्षेत्रीय शान्ति र स्थायित्वलाई गम्भीर रूपमा असर पार्न सक्ने चेतावनी दिएका छन्।उनले हालै आक्रमणको निशानामा परेका अन्य देशहरूप्रति पनि एकता र समर्थन व्यक्त गर्दै यस्तो संकटले विश्वव्यापी ऊर्जा बजारमा समेत असर पार्न सक्ने बताएका छन्।
अल थानीका अनुसार सुरक्षालाई ध्यानमा राख्दै कतारले आफ्ना केही ऊर्जा पूर्वाधारसँग सम्बन्धित गतिविधिमा अस्थायी सावधानीका उपायहरू अपनाउनुपरेको थियो। यस्तो निर्णय ऊर्जा संरचनाको सुरक्षा सुनिश्चित गर्नका लागि गरिएको उनले स्पष्ट पारे।यद्यपि, उनले अवस्था सामान्य भएपछि ऊर्जा आपूर्ति पूर्ण रूपमा पुनः सुरु गरिने बताएका छन्। विश्वका प्रमुख तरल प्राकृतिक ग्यास (LNG) निर्यातकर्तामध्ये एक भएकाले कतारको ऊर्जा उत्पादनमा हुने कुनै पनि अवरोधले विश्व ऊर्जा बजारमा प्रत्यक्ष प्रभाव पार्न सक्छ।
प्रधानमन्त्री अल थानीले वर्तमान संकट समाधानका लागि कूटनीतिक पहललाई प्राथमिकता दिनुपर्ने आवश्यकता पनि औंल्याए। उनले कतार क्षेत्रीय तनाव कम गर्न र स्थायित्व कायम राख्न अन्तर्राष्ट्रिय प्रयासमा निरन्तर सहयोग गर्न प्रतिबद्ध रहेको बताएका छन्।सम्मेलनमा सहभागी नेताहरूले पनि सबै पक्षलाई संयमता अपनाउन र कूटनीतिक संवादमार्फत समाधान खोज्न आग्रह गरेका छन्।
विश्लेषकहरूका अनुसार मध्यपूर्वमा बढ्दो तनावले क्षेत्रीय सुरक्षा मात्र होइन, विश्व अर्थतन्त्र र ऊर्जा आपूर्तिमा समेत ठूलो प्रभाव पार्न सक्छ। त्यसैले अन्तर्राष्ट्रिय समुदायले हालको परिस्थितिलाई नजिकबाट निगरानी गरिरहेको बताइएको छ।
