काठमाडौं, राजेन्द्र महतोको नेतृत्वमा रहेको "राष्ट्रिय मुक्ति पार्टी नेपाल" भित्र ठूलो राजनीतिक हलचल पैदा भएको छ। पार्टीको कार्यशैली र राजनीतिक दिशाप्रति असन्तुष्टि जनाउँदै केन्द्रीय सचिव सञ्जय कुमार चौधरीसहित १२ जना प्रभावशाली नेता तथा कार्यकर्ताहरूले सामूहिक रूपमा पार्टी परित्यागको घोषणा गरेका छन्। सोमबार एक संयुक्त विज्ञप्ति जारी गर्दै उनीहरूले पार्टीको साधारण सदस्यसमेत नरहने गरी राजीनामा दिएको जानकारी गराएका हुन्। किन छोडे पार्टी? विज्ञप्तिमा उल्लेख भए अनुसार, मुलुक गम्भीर राजनीतिक संकट र दिशाहीनताको अवस्थामा पुगेको बेला दलगत संकीर्णता, अवसरवाद र व्यक्ति केन्द्रित राजनीतिले जनतामा निराशा थपेको निष्कर्ष निकालिएको छ। नेताहरूले पार्टीगत आवरणभन्दा माथि उठेर देश, जनता र विधिको शासनका लागि नयाँ राजनीतिक यात्रा सुरु गर्नुपर्ने आवश्यकता महसुस गरी यो निर्णय लिएको बताएका छन्। पार्टी छाड्नेहरूले वर्तमान नेतृत्व (राजेन्द्र महतो) बाट जनअपेक्षा पूरा हुन नसक्ने र पार्टी विभाजनकारी एवं यथास्थितिवादी बाटोमा लागेको आरोप समेत लगाएका छन्। पार्टी छाड्ने नेताहरूको सूची: सामूहिक राजीनामा बुझाउनेहरूमा पार्टीका माथिल्लो तहका जिम्मेवार नेताहरू रहेका छन्: १. सञ्जय कुमार चौधरी - केन्द्रीय सचिव २. सञ्जय कुमार सिंह - अध्यक्ष, केन्द्रीय अनुशासन विभाग एवं कार्यसमिति सदस्य ३. विजय कुमार राय - केन्द्रीय सदस्य ४. राजा राम कापर - राष्ट्रिय परिषद सदस्य ५. अशोक ठाकुर - केन्द्रीय सदस्य ६. सञ्जय गाडिया - केन्द्रीय सदस्य ७. विजय नायक - सदस्य, राष्ट्रिय परिषद ८. नितु यादव पासवान - केन्द्रीय सदस्य ९. पुनम यादव - समानुपातिक उम्मेदवार १०. मरगुन पासवान - केन्द्रीय नेता ११. गुलो देवी पासवान - केन्द्रीय सदस्य (समानुपातिक उम्मेदवार) १२. राम चन्द्र साह - केन्द्रीय सदस्य आगामी योजना पार्टी परित्याग गरेका नेताहरूले अबको केही दिनभित्रै "नयाँ राजनीतिक यात्रा" को औपचारिक घोषणा गर्ने बताएका छन्। उनीहरूले देशको सार्वभौमिकता, लोकतन्त्र र जनअधिकारको पक्षमा दृढतापूर्वक उभिने प्रतिवद्धता समेत व्यक्त गरेका छन्। राजेन्द्र महतोले बाहुनवाद र राज्यको विभेद विरुद्ध भन्दै 'राष्ट्रिय मुक्ति आन्दोलन' मार्फत नयाँ पार्टी गठन गरेको केही समयमै मुख्य पदाधिकारी र केन्द्रीय सदस्यहरूले नै साथ छाड्नुलाई राजनीतिक वृत्तमा अर्थपूर्ण रूपमा हेरिएको छ।