पुस १८, २०८२
@सुनिल सिंह बिर्तामोड
भद्रपुर विमानस्थलमा अवतरणका क्रममा बुद्ध एयरको विमान रनवेबाट चिप्लिएर बाहिरिएको छ। घटनामा कुनै मानवीय क्षति नभए पनि यात्रुहरूमा केहीबेर त्रास उत्पन्न भएको थियो।झापाका प्रहरी प्रमुख प्रहरी उपरीक्षक राजन लिम्बूका अनुसार विमान रनवे पार गर्दै जाँदा नियन्त्रण गुमेपछि करिब १८० मिटर जति घाँसे मैदानतर्फ पुगेको थियो। विमानलाई नियन्त्रणमा लिइएपछि सबै यात्रुहरूलाई सुरक्षित स्थानमा झारिएको थियो।
झापाका प्रमुख जिल्ला अधिकारी शिवराम गेलालका भनाइअनुसार, काठमाडौँ–भद्रपुर उडान सङ्ख्या ९०१ र दर्ता नम्बर नाइन–एन–एएमएफ भएको विमान अवतरणको अन्तिम चरणमा ‘ओभर–रन’ भएको हो।
उनले भने,“अवतरणपछि विमान केही अगाडि सर्दै घाँसे क्षेत्रमा पुगेको हो। तर, ५१ जना यात्रु र चारै जना चालक दलका सदस्य सबैजना सकुशल हुनुहुन्छ। कुनै गम्भीर घटना भएको छैन।”
बिमान काठमाडौँबाट साँझ ७:०० बजे उडान भरेको थियो र करिब ९:४५ बजे अवतरण गर्ने क्रममा घटना भएको हो। घटनापछि केही समयका लागि भद्रपुर विमानस्थलमा उडान–अवतरण रोकिएको र आवत–जावत आंशिक रूपमा प्रभावित भएको अधिकारीहरूले बताएका छन्।प्राविधिक टोली घटनास्थलमा पुगेर विमानको अवस्था निरीक्षण गर्दै छ। विमानस्थलको सुरक्षाकर्मी, प्रहरी र उद्धार टोलीले यात्रुलाई क्रमशः बाहिर निकालेर टर्मिनल भवनतर्फ सारिएको थियो।
विमान रनवेबाट बाहिरिँदा यात्रुबीच केही समय तनाव र आतङ्क फैलिएको यात्रुहरूले बताए। तर प्राथमिक जाँचमा कसैलाई गम्भीर चोटपटक नलागेको जानकारी दिइएको छ। केही यात्रुमा सामान्य असहजता र आक्रोश देखिए पनि स्वास्थ्य परीक्षणपछि उनीहरूलाई घरतर्फ पठाइएको बताइन्छ।
घटनाबारे विस्तृत अनुसन्धान सुरु गरिएको छ। प्रारम्भिक चरणमा मौसम, रनवेको सतह, ब्रेकिङ प्रणाली, पाइलटको निर्णय र अन्य प्राविधिक पक्षबारे अध्ययन हुने अधिकारीहरूले बताएका छन्।बुद्ध एयर र नागरिक उड्डयन प्राधिकरण दुबै संस्थाले संयुक्त रूपमा प्रतिवेदन तयार पार्ने र आवश्यक भए सुधारात्मक कदम चाल्ने बताएका छन्। हालका लागि विमानस्थल सञ्चालन सुरक्षित रहेको जनाइएको छ।
अधिकारीहरूले यात्रुहरूलाई अनावश्यक अफवाहमा नलाग्न अनुरोध गर्दै औपचारिक सूचना पर्खन आग्रह गरेका छन्। नागरिक उड्डयन प्राधिकरणका अनुसार, यस्ता घटनामा मानवीय क्षति नभए पनि सावधानी र सुरक्षा मापदण्डको पुनर्मूल्यांकन आवश्यक हुन्छ।
