सिन्हुवा बीजिङ, चीन

नयाँ वर्ष २०२६ को पहिलो बिहान चीनको राजधानी बीजिङस्थित ऐतिहासिक तियानआनमेन स्क्वायरमा राष्ट्रिय झण्डा उत्थानको भव्य समारोह आयोजना गरिएको छ। चीनको राष्ट्रिय प्रतीक मानिने यस चोकमा आयोजित कार्यक्रम जनमुक्ति सेनाका सम्मान गार्डको औपचारिक उपस्थितिसहित सम्पन्न भएको हो।बिहान सूर्योदयसँगै राष्ट्रिय गान बज्दा सैनिकहरूले निर्धारित ताल र परम्पराअनुसार झण्डा मस्तुलको टुप्पोमा चढाए। समारोह अवलोकन गर्न देशका विभिन्न प्रान्तबाट आएका नागरिक, विद्यार्थी, सैनिक परिवार, पर्यटक तथा स्थानीय बासिन्दासमेत हजारौँको सहभागिता थियो। धेरैले समारोहको क्षण तस्वीर र भिडियोमा कैद गर्दै नयाँ वर्षको शुभकामना साटासाट गरे।सरकारका अनुसार प्रत्येक वर्ष आयोजना गरिने यो कार्यक्रमले “राष्ट्रको एकता, राष्ट्रिय गौरव र समृद्धितर्फको यात्रालाई स्मरण” गराउने उद्देश्य बोकेको छ। नयाँ वर्षको अवसरमा तियानआनमेन स्क्वायर वरपर कडा सुरक्षा व्यवस्था गरिएको थियो भने यातायात नियमन र भीड व्यवस्थापनका लागि ठूलो संख्यामा सुरक्षाकर्मी खटाइएको थियो।समारोहलाई विशेषतः युवापुस्तालाई देशप्रतिको कर्तव्य र जिम्मेवारीबारे जागरूक गराउने अवसरका रूपमा हेर्ने गरिएको छ। कार्यक्रमपछि धेरै अभिभावकले आफ्ना बालबालिकालाई ऐतिहासिक स्थल र राष्ट्रिय प्रतीकबारे जानकारी गराएका थिए।उक्त समारोहका दृश्यहरू चिनियाँ समाचार एजेन्सी का फोटोग्राफर जू हुआन्जोङले कैद गरेका हुन्।