पुस ४, २०८२
पोखरा । करिब २० करोड रुपैयाँ बराबरको आर्थिक अनियमिततासँग जोडिएको विवादमा परेको मणिपाल शिक्षण संस्थालाई पोखरा महानगरपालिकाले सम्मान गरेको घटनाले चौतर्फी आलोचना निम्त्याएको छ। गम्भीर आरोप र छानबिनको माग उठिरहेको समयमा महानगरको यस्तो कदमलाई गैरजिम्मेवार भन्दै नागरिक समाज र सरोकारवालाहरूले प्रश्न उठाएका छन्।मणिपालसँग सम्बन्धित आर्थिक कारोबारमा अनियमितता भएको आरोप सार्वजनिक हुँदै आएको छ। उक्त विषयमा निष्पक्ष छानबिन हुनुपर्ने माग भइरहेका बेला महानगरपालिकाले सार्वजनिक कार्यक्रममार्फत संस्थालाई सम्मान गर्नुले सुशासन र जवाफदेहितामाथि प्रश्न खडा गरेको आलोचकहरूको भनाइ छ।स्थानीय बुद्धिजीवी तथा नागरिक अगुवाहरूले विवादमा तानिएको संस्थालाई सम्मान गर्नुको सट्टा सत्यतथ्य सार्वजनिक गर्न र छानबिन अघि बढाउन महानगरले भूमिका खेल्नुपर्ने बताएका छन्। “आरोप टुंगो नलाग्दै सम्मान गरिनु गलत सन्देश जाने काम हो,” एक नागरिक अगुवाले प्रतिक्रिया दिए।यस विषयमा पोखरा महानगरपालिकाका केही पदाधिकारीहरूले भने सम्मान कार्यक्रम नियमित तथा पूर्वनिर्धारित भएको दाबी गर्दै यसलाई विवादसँग नजोड्न आग्रह गरेका छन्। तर आलोचकहरूले यस्तो स्पष्टिकरणले जनताको आशंका मेटिन नसक्ने बताएका छन्।२० करोड काण्डको निष्पक्ष छानबिन, तथ्य सार्वजनिक गर्नुपर्ने माग र जिम्मेवार निकायको भूमिकाबारे सामाजिक सञ्जाल तथा सार्वजनिक वृत्तमा बहस चर्किंदै गएको छ।
