इस्टानबुल, अक्टोबर ३१, २०२५ — तुर्की र कतारको मध्यस्थतामा अफगानिस्तान र पाकिस्तानबीच इस्टानबुलमा भएको वार्तापछि दुबै देशले हालैको युद्धविराम कायम राख्ने सहमति गरेका छन्। यो जानकारी शुक्रबार तुर्कीको परराष्ट्र मन्त्रालयले X (पूर्व ट्विटर) मा जारी गरेको संयुक्त विज्ञप्तिमा उल्लेख गरिएको छ।अक्टोबर २५ देखि ३० सम्म चलेका उच्चस्तरीय बैठकहरू अक्टोबर १८–१९ मा दोहामा सम्पन्न प्रारम्भिक सम्झौतामा आधारित थिए, जसको उद्देश्य युद्धविरामलाई स्थायी बनाउने र यसको अनुगमन प्रणाली तयार गर्ने थियो।विज्ञप्तिमा भनिएको छ, “सबै पक्षहरूले युद्धविरामलाई निरन्तरता दिन सहमति जनाएका छन्।” साथै, नभेम्बर ६ मा इस्टानबुलमा हुने अर्को उच्चस्तरीय बैठकमा कार्यान्वयनका थप विवरण र निगरानी संयन्त्रबारे अन्तिम निर्णय हुने जनाइएको छ। युद्धविरामको पालना सुनिश्चित गर्न र उल्लंघन गर्ने पक्षमाथि कारबाही गर्न निगरानी तथा प्रमाणीकरण संयन्त्र पनि स्थापना गरिने बताइएको छ।मध्यस्थकर्ताको हैसियतमा तुर्की र कतारले दुबै देशको सक्रिय भूमिकाको प्रशंसा गर्दै दिगो शान्ति र स्थायित्वका लागि निरन्तर सहयोग गर्ने प्रतिवद्धता जनाएका छन्।यो वार्ता दुबै देशबीच हालै बढेको तनाव र सीमा झडपहरूपछि भएको हो। डनका अनुसार, अफगान तालिबान र पाकिस्तानी प्रतिनिधि बीचको दोस्रो चरणको वार्ता शनिबार सुरु भएको थियो, तर इस्लामाबादको आतंकवादी आक्रमणसम्बन्धी चिन्ताका कारण वार्ता केही समय थपिएको गतिरोधमा पुगेको थियो।मध्यस्थकर्ताहरूले अन्तिम प्रयासका रूपमा बिहीबार दुबै पक्षलाई पुनः वार्ता टेबलमा ल्याउने प्रयास गरेका थिए। कतार र तुर्कीले पाकिस्तानसँग गहिरो सम्बन्ध राख्दै विगतमा पनि तालिबान र नेटोबीचको वार्तामा भूमिका निर्वाह गरेका थिए।हाल पाकिस्तान र अफगानिस्तानबीच सम्बन्ध अक्टोबर ११ को सीमा आक्रमणपछि अत्यन्त तनावग्रस्त बनेको छ। अफगान पक्षले पाकिस्तानले हवाई आक्रमण गरेको आरोप लगाएको भए पनि इस्लामाबादले यसको पुष्टि वा खण्डन गरेको छैन।पाकिस्तानले बारम्बार तालिबानलाई “आतङ्कवादी समूहहरूले आफ्नो भूमि प्रयोग नगर्न दिनुहोस्” भनेर आग्रह गर्दै आएको छ, तर तालिबानले यस्तो आरोप अस्वीकार गर्दै आएको छ। यसबीच पाकिस्तानमा आतंकवादी घटनामा सुरक्षा अधिकारीहरू मारिने घटना बढ्दो क्रममा छ।यी घटनाक्रमपछि दुवै देश दोहामा बसेर अस्थायी युद्धविराममा सहमत भएका थिए र त्यसको कार्यान्वयनका लागि इस्टानबुलमा पुनः भेट हुने निर्णय गरेका थिए।तर बुधबार पाकिस्तानी मन्त्री अत्ताउल्लाह तारारले X मा लेख्दै भनेका छन् कि यसपटकको वार्ताले “व्यावहारिक नतिजा ल्याउन सकेन,” र पाकिस्तानले “आतंकवादबाट आफ्ना नागरिकलाई जोगाउन सबै सम्भावित उपायहरू अपनाउनेछ।”